Aproveita Loron Bazar, MS Vasina ema 670 iha Atsabe

ATSABE, www.news-viptv.com –  Loron bazar ne’ebe implementa iha Munisipiu Ermera, lori Ministeriu Saude (MS) aproveita loron ne’e hodi fo vasinasaun ba komunidade iha Atsabe hamutuk nain 670.

Aproveita loron bazar iha Atsabe, Munisipiu Ermera, Tersa (5/4/2022),  Ministra Saúde dr. Odete Maria Freitas Belo ho Ekipa Konsege fo vasinasaun ba komunidade elijivel ne’ebé mai faan sasán hamutuk ema 670 mak simu sira-nia vasina 1°doze, 2° doze nomós Booster/Pfizer. Vasinasaun ne’e inklui estudante sira ne’ebé ho idade 12 to’o menus 18.

Iha loron hanesan, Vise- Ministru Saude Bonifacio Mau Coli dos Reis hamutuk ho Diretora Jeral Prestasaun Saude, Dra.Odete da Silva Viegas ho ekipa mos hala’o kampana vasinasaun COVID-19 iha Merkadu Municipal Railaku villa no Suku Fatuquero, Postu Administrativu Railaco.

Bonifácio ho nia ekipa kontinua apela ba komunidade sira ne’ebe seidauk kompleta vasina atu hakbesik an ba sentru saude hodi simu vasina kompletu.

“Ha’u husu ba inan, aman sira-ne’ebé mak simu ona vasina 1°doze tenki ba simu tan 2° doze no ne’ebé mak simu ona 2° doze, tenki kompleta tan Pfizer/Booster, nune’e bele hetan imunidade ida di’ak bele hasoru virus Covid-19 ne’e,” dehan Bonifacio.

COVID-19 nu’udar moras perigu ne’ebe espalha iha mundo desde tinan 2019 ne’ebe hamate ema rihun ba rihun iha mundo. Mundo tomak dadaun ne’e luta nafatin hasoru virus refere.

Total kazu obitu iha Timor-Leste hosi tinan 2020-2022 hamutuk nain 130, enkuantu kazu komulativu hamutuk 22.832.

Governu konsege fo vasinasaun nasional ba doze dahuluk ho 79.8% no 62.9% ba doze daruak no doze Booster 3.8%. Entretantu labarik ho idade 12-18 ne’ebe simu ona vasina Pfizer/booster doze dahuluk 54.3% no 21.0%. Ba doze daruak.