Apoia Setor Saude iha TL, Tailandia Sei Kria Matadalan ba Kuidadu Saude Inan no Oan

DILI, www.news-viptv.com – Tailandia iha nia koperasaun bilateral ho Timor-Leste kontinua nia apoia iha setor saude hodi kria matadalan ba kuidade saude inan ho oan.

Komitmentu Tailandia ne’e hatoo dereta hosi Embaixador Tailandia ba Timor-Leste, Atipat Rojamapaibulya wainhira hasoru malu ho Primeiru Ministru Xanana Gusmão, Tersa (19/3/2024), iha Palacio do Governo, Dili.

Alende ne’e relasiona ho adezaun Timor-Leste ba ASEAN, nasaun fundador ASEAN ne’e mos sei fo apoia Timor-Leste iha kapasitasaun rekursu umanu.

“Ida ne’e hanesan kooperasaun importante ba dezenvolvimentu Timor-Leste no Tailandia apoia nafatin Timor-Leste iha area importante sira no adezasaun Timor-Leste ati sai membru ASEAN,” dehan Embaixador Atipat Rojamapaibulya ba jornalista.

Durante enkontru, Embaixador Atipat konvida Xefe Governu Xanana atu hala’o vizita ba Tailândia hodi fahe esperensia kona-ba industria Kafe ba foin sa’e no setór privadu sira hosi Thailandia.

Tailândia, liu husi nia Kooperasaun Teknika, Agensia Kooperasaun Internasionál Tailândia (TICA) sempre apoiu governu no sosiedade Timór iha área oin-oin.

Iha enkontru ne’e, PM Xanana hato’o agradese ba apoiu hirak ne’e, no Governu kontinua koordena nafatin ho liña ministériu sira hodi kontaktu Embaixada Tailândia bele servisu hamutuk implementa kooperasaun hirak ne’ebé deskute.

Entretantu, Timor-Leste no Tailandia estabelese relasaun diplomatika iha fulan Outubru 2002, hafoin nasaun ne’e restaura independensia no Governu Tailândia haruka ninia forsa partisipa iha misaun Manutensaun Pas Organizasaun Nasoena Unidas (ONU) durante Administrasaun Tranzitoria.