APC Rejista Uma 1 iha Cailaco Hetan Estragus Tamba Rai Nakdoko

DILI, www.news-viptv.com – Autoridade Protesaun Sivil (APC) rejista komunidade nia uma ida iha Aldeia Lia-Bote, Suku Milego, Postu Administrativu Cailaco, Munisipiu Bobonaro hetan estragus tamba impaktu rai nakadoko ne’ebe akontese iha Timor Tengah Selatan (TTS), Provinsia Nusa Tenggara Timur (NTT), Indonesia, Kinta (31/8/2023), iha tuku 19.29 oras Timor-Leste.

Maski rai nakadoko ne’e nia sentru iha 54 kilometru TTS, ho nia forsa magnitude 5.4, komunidade iha Kapital Dili mos sente nia nakadoko.

Alende rejista uma komunidade ida ne’ebe hetan estragus tamba impaktu rai nakadoko ne’e, Diretor Gabinete Relasaun Externa no Komunikasaun APC, Anacleto Caetano, M.AP informa iha tan uma komunidade hamutuk 24 maka hetan estragus durante relatoriu periodu 29 Agostu to’o 4 Setembru 2023, tamba dezastre naturais seluk hanesan anin bo’ot, rai halai no ahi-han uma.

Uma komunidade nian sira ne’e APC rejista hosi Municipio Baucau (ahi han uma 1, anin sobu uma 7), Municipio Bobonaro ( ahi han uma 1, rai nakadoko estraga uma 1), Municipio Dili (ahi han uma 1), Municipio Manufahi (Rai halai estraga uma 2), Municipio Liquisa (ahi han uma 2), Municipio Viqueque ( ahi han uma 1, anin sobu uma 1, rai halai estraga uma 1), no RAEOA (ahi han uma 5 no anin sobu uma 1).

“APC kontinua halo hela levantamentu  detallus konaba sasan ne’ebe estragus no lakon,” hateten Anacleto ba jornalista sira iha konferensia imprensa ne’ebe halo iha edifisiu APC Kaikoli, Dili, Segunda (04/9/2023).

Diretor ne’e mos informa, dadus ne’ebe APC rekolla husi Janeiru to 4 Setembro hamutuk 2.197 maka hetan estragus no konsege rekupera ona 150.

“Iha semana ida liu ba sei iha 1,062 maibe hamenus tan ba 1000 tamba agora dadaun Sekretariu Estadu halao distribuisaun material ba uma afetado sira iha Municipio Liquica.

Uma ne’ebe Sekretariu Estado halo distribuisaun ba total uma 62 Uma ne’ebe at total iha 19, uma Neebe at normal iha 22, no uma at naton iha 21 iha Municipio Liquica,” esplika Anacleto.