Anin Bo’ot Sobu Uma 48 iha Baucau

DILI, www.news-viptv.com – Anin bo’ot ne’ebe akontese iha Munisipiu Baucau rezulta uma 48 hetan estragus.

Iha Konferensia imprensa, Diretor Gabinete Relasaun Externa no Komunikasaun APC, Cesario Marques informa, alende uma 48 iha Munisipiu Baucau ne’ebe hetan estragus, APC mos rejista uma 7 seluk ne’ebe hetan estragus kauza husi anin bo’ot durante periodu 30 Setembru to’o 7 Outubru 2024.

Ho dezastre hirak ne’e, total kazu hamutuk 61, ne’ebe fahe ba kategoria anin sobu uma 55, no insendiu 7, no rai halai 1.

“Munisipiu ne’ebe maka hetan afetadus maka Munisipiu Bobonaru ensendiu (1), Munisipiu Baucau anin sobu hamutuk 48, Munisipiu Liquisa anin sobu 2, Munisipiu Manatutu insendiu 1, rai halai 1, no anin sobu uma 3, RAEOA insendiu 3, Munisipiu Viqueque anin sobu uma 2,” dehan Cesario ba jornalista sira, Segunda (7/10/2024), iha Edifisiu APC, Kaikoli, Dili.

To’o ohin loron APC resjista ona kazu uma ne’ebe estragus tamba insendiu hamutuk 172, inundasaun ou be’e sa’e 1.432, rai halai 152, nomos komunidade ga vitima dezastre ne’ebe simu material rekoperasaun hamutuk 3.145.