Ahi-Han Uma 12 iha Baqui

DILI, www.news-viptv.com  – Uma komunidade hamutuk 12 iha Baqui, Suku Usi-Tasai, Postu Oesilo, RAEOA estragus tamba ahi-han ou insendiu.

Uma 12 ne’ebe ahi han ne’e akontese iha 12 Novembru 2024 no rejista ona husi Autoridade Protesaun Civil (APC) iha lista dezastre naturais ne’ebe akontese durante periodu 11 to’o 18 Novembru 2024.

Alende uma 12 iha Baqui-RAEOA, APC mos rejista uma ida iha Kapital Dili estragus tamba ahi-han. Uma ne’ebe ahi han ne’e husi Aldeia Terus Nain, Suku Vila-Verde, Postu Administrativu Dom Aleixo.

“Akontese tipu dezastre oin rua ne’ebé ho numeru estragus 13, anin sobu uma 1 no Ahi han uma hamutuk 13, afetadus hamutuk 59,” informa Xefi Seksaun Relasaun Externa GREC, Nelson Orleans ba Jornalista sira, Segunda (18/11/2024) iha Edifisiu APC Kaikoli, Dili.

Alende ne’e, APC mos rejista uma ida estragus tamba hetan hanesan husi ai monu iha Munisipiu Baukau, Postu Administrativu Baukau.

“APC fo ona apoiu emerjensia ba komunidade sira ne’ebé afetadu,” dehan Nelson.

Nelson mos esklarese katak to’o ohin loron APC foin maka iha sentru evakuasaun iha Munisipiu Covalima ne’ebe harii iha Suai no Munisipiu Viqueque.

Ba munisipiu seluk, inklui Kapital Dili, sentru evakuasaun sempre halo koordenasaun ho edifisiu eskola sira, inklui fatin madre ou padre sira.