Adezaun ASEAN, Timor-Leste Agradese Brunei Darussalam nia Apoia

DILI, www.news-viptv.com – Prezidenti Republika (PR) Jose Ramos-Horta agradese ba Brunei Darussalam nian apoia ba supporta Timor-Leste nian adezaun ASEAN.

Agradesementu ne’e Xefi Estadu hato’o wainhira partisipa Open Office Reception ne’ebe Embaixada Brunei Darussalam halo iha Tersa (7/5/2024), iha Komplex Timor Plaza, Dili.

Ba Jornalista sira, PR Ramos-Horta informa katak iha komemorasaun 20 de Maiu, xefi estadu konvida ona Sultan Hassanal Bolkiah hodi partisipa loron aniversáriu restaurasaun indepéndénsia Timor-Leste nian ba da-22.

“Vizita Sua Majestade (Sultan Bolkiah, red) importante hodi hametin liután relasaun bilaterál sira,” dehan PR Ramos-Horta.

Ema numeru ida iha Timor-Leste ne’e esklarese katak nu’udar xefi estadu nia sempre tau importánsia konvite husi embaixada sira ne’ebe rezidensia iha Timor-Leste hodi hatudu respeita no partisipa iha eventu kulturál hosi rai idak-idak nian.

“Se ita-nia bainaka hanesan embaixada sira hala’o serimónia ruma, ita presiza hatudu respeitu no hakarak atu partisipa, tan ne’e mak ha’u mai iha ne’e,” dehan xefi estadu.