ADB Sei Halo Revizaun ba Atividade ih Timor-Leste

DILI, www.news-viptv.com – Atu hasa’e liu tan kooperasaun entre Banku Dezemvolvimentu Aziatiku (ADB, sigla English) ho Timor-Leste, ADB sei halo revisaun nia atividade balun ne’ebe halo ona iha Timor-Leste.

“Ami mós uza tempu atu halo revizaun ba atividade sira ne’ebé hala’o hela husi Banku Dezenvolvimentu Aziatiku iha Timor-Leste hodi apoia nasaun ne’e iha infraestrutura bázika no asesu ba servisu sira, hadi’a ekonomia no kria empregu,” dehan Diretór Jerál ADB Regionál Sudeste Àsiatku, Winfried Wicklein ba jornalista sira hafoin ho Diretora ADB Timor-Leste Stefania Dina hasoru malu ho Primeiru Ministru Xanana Gusmão, Segunda (19/2/2024), iha Palacio do Governo, Dili.

Revizaun ba atividade ne’e, ADB halo hafoin halo diskusaun ho PM Xanana ba servisu no progressu ADB nian iha Timor-Leste.

Inprinsipiu, Winfried hateten, ADB kontinua nia komitmentu hodi bele supporta nafatin Timor-Leste ba nia dezemvolvimentu iha futuru.

“Tanba ne’e ho Primeiru-Ministru, ida-ne’e mak priviléjiu ida ba ha’u no ba Banku Dezenvolvimentu Aziatiku atu hasoru malu ho Primeiru-Ministru, nota troka nian, aprende husi Primeiru-Ministru kona-ba ninia prioridade sira no kona-ba asuntu balun ne’ebé nia servisu hela, no mós identifika área balun ne’ebé Banku Dezenvolvimentu Aziatiku bele suporta Timor-Leste iha future,” dehan Winfried.

ADB suporta ona Timor-Leste hahú husi tinan 1999 ho fokus atu hasai bottleneck infraestrutura no limitasaun institusionál sira hodi loke dalan ba dezenvolvimentu sustentavel liu. ADB nia portfolio ne’ebé habelar daudaun ne’e suporta esforsu governu nian atu diversifika ekonomia.

ADB no Governu Timor-Leste asina ona empréstimu millaun US$ 127 iha 2022, hodi fornese bee ne’ebe seguru no konfiavel iha sidade Kapitál Dili, ba uma tersu-rua husi populasaun iha nasaun ne’e.

Projetu ne’e sei tulun dezenvolvimentu infraestrutura sira ne’ebé reziliente ba klima ba tratamentu bee no kriasaun rede bee foun ida atu lori bee-moos ba uma-kain 36,200 no estabelesimentu komersiál sira. Suporta mos operasaun funsionál prinsipál sira husi utilidade servisu bee-moos estadu nian, Bee Timor-Leste.

To’o ohin loron, ADB kompromete ona empréstimu, subsídiu no asisténsia téknika husi setór públiku hamutuk tokon US$ 751.5 ba Timor-Leste. Empréstimu kumulativu no desembolsu ba Timor-Leste hamutuk tokon US$ 269.28. Rekursu hirak-ne’e finansia husi rekursu regulár no rekursu rekursu kapitál baibain, Fundu Dezenvolvimentu Aziatiku no fundu espesiál sira seluk. BDB nia portfolio soberanu ne’ebé la’o hela Timor-Leste inklui empréstimu 14 no subsídiu 1 ho valór tokon US$ 575.5.