AD. SLB Fahe Pontu, Hafoin Joga Empata 1-1 Kontra FC. Maranatha

DILI, news-viptv.com – AD. SLB tenki fahe pontu ho FC. Marantha, hafoin jogu entre klubu rua ne’e termina ho rezultadu empata 1-1 iha kontinuasaun jogu Primeira Divisaun Liga Timorense Futebol de Femenino (FTFF) epoka 2021, Domingu (22/8/2021), iha Estdaiu Municipal Dili.

SLB ne’ebe iha jogu ne’e tuun ho sira nia kamizola mean-azul, hetan supreza ho golu Agia Bria iha minutu 6. Golu Agia nian ne’e akontese hafoin blunder Trifonia Mesquita ne’ebe ho intensaun passa bola ba nia baliza, Agustinha Nogueira, ho matenek hadau hosi Agia no baliza adversariu labele hadau hikas bola ne’ebe iha Agia nia ain.  

Lakon ona golu ida, SLB ne’ebe monta nia avansadu nain tolu Julia Belo, Milenia Saldanha ho Elvira Silva tenta ataka area defeza Maranatha, maibe sira taka ne’e bele hamate hosi defeza Maranatha ne’ebe komanda hosi Brigida Costa no hetan apoiu hosi Ana Belo, Graciela Amaral ho Saturnina Costa.

SLB lolo’os bele muda skoru sai empata 1-1, hafoin failla uza oportunidade diak bola ne’ebe passa hosi Milenia Saldanha.

Nudar klubu ne’ebe naran bo’ot, iha segunda parte, SLB liu hosi Elvira Silva konsege hatama golu ba baliza Marantha ne’ebe guarda hosi Agueda Ximenes.

Bola ne’e Elvira Silva hatama hafoin bola barullu iha area baliza Marantha. Bola falta ne’ebe lansa hosi Natalia Costa kona deit rin baliza no bola konsege guarda metin hosi Brigida Costa maibe, jogador mediu no avansa SLB ne’ebe nakonu ona iha area defeza la fo fatin defeza Maranatha atu salva bola no ikus Milenia Saldanha ho kalma fo assist ba Elvira Silva ne’ebe livre hosi defeza ho matenek suta bola neneik ba baliza Marantha ne’ebe mamuk ona.

Iha jogu ne’e rasik, SLB domina jogu, maibe avansadu SLB sira kontinua labele hatama tan golu tamba kontinua hetan presaun metin hosi defeza Marantha.

”Hau senti kontenti tamba ami nia ekipa preparadu no la saugati no hatudu duni jogu, maske ho rezultadu empata, maibe nafatin satisfas ba hau nia a’an no hau nia ekipa no mos treinador,” hateten Agia Bria ba news-viptv.com.  

Iha tempu hanesan, Treinador FC Maranatha, Januario Almeida, hatete senti kontenti ho rezultadu empata ne’e.

”Hau hanesan treinador orgullu ho kontenti ho rezultadu ida ne’e, maske iha segundu parte jogador sira la aguenta ho estamina mak monu, entaun faillansu treinador, ho ida mak henesan treinador prepara diak liu tan iha jogu tuir mai,” komentariu Januario.

Lia hanesan hato’o hosi treinador AD. SLB, Joao Manuel da Silva,”Hau hare ohin ne’e ba jogu primeiru beban makas liu ba mental, rezultadu jogu sesuai ho situasaun jogu primeiru maibe hau nafatin kontente ho rezultadu ne’e”.

Treinador ne’e esplika katak, golu adversariu nian ne’ebe hatama hosi Agia Bria tamba failansu hosi nia defeza mak halo golu ne’e akontese.