Aban, PD Sei Hili Assanami ou Loromau ba Kandidatura PR

DILI, www.news-viptv.com – Partido Democrático (PD) sei realiza nia konvensaun nasional hodi hili sira nia kandidatura ba Prezidenti Republika (PR) hodi avansa iha Eleisaun Prezidensial 19 Marsu 2022.

Iha konvensaun nasional ne’ebe sei halo aban (Sabadu, 22 Janieiru 2022) iha Salaun Leokase, Raikotu, Dili, PD sei hili entre figura rua partidu nian maka Marianao “Assanami” Sabino ou Adriano Nascimento “Loromau”.

Assanami dadauk ne’e asumi kargu nudar prezidenti partidu entertantu Loromau nudar prezidenti Komite Politika Nasional partidu nian. Alende ne’e kandidatura rua ne’e mos nudar membru Parlamentu Nasional.

Partido Democratico (PD) harii iha 10 Junu 2001. Tempu ne’ebe PD lidera hosi Prezidenti (Saudozu) Fernando “La-Sama” de Araujo.

Iha nia prezensa iha eleisaun Assembleia Konstituante, PD konsege hetan kadeira 7 hafoin hetan konfiansa votos hamutu 31.680.

Iha Eleisaun Parlamentar 2007, votos PD sa’e ba 46.946 no hetan kadeira 8. Iha 2007, PD hamutuk harii Governu ho Partidu CNRT, ASDT no PSD.

Iha 2012, PD mantein hetan kadeira 8 maski sira nia votos aumenta ba 48.851 no kontinua hamutuk ho governasaun Primeiru MInistru Kay Rala Xanana Gusmão.

Maski iha 2017, votos PD aumenta 55.595 iha lideransa Mariano “Assanami” Sabino, PD tenki lakon kadeira ida hosi 8 ba 7 deit, tamba hetan deit porsentazem 9.79.

Iha 2017, PD hamutuk fali ho Partidu FRETILIN harii Governu ho lideransa PM Mari Alkatiri. Maibe governasaun ne’e to’o deit fulan 8 no Prezidenti Republika Francisco Guterres Lu-Olo tenki realiza fali eleisaun antesipada.

Iha eleisaun antisipada 2018, PD sai deit opozisaun hodi kontinua kontrola ezekusaun orsamentu jeral estadu iha Parlamentu Nasional.

Ba kandidatura Prezidenti Republika, antes ne’e PD dala tolu ona fo nia figura hodi kompete maski lakon hela deit. Figura ne’e maka Saudozu Fernando “La-Sama” de Araujo (2007 ho 2012) no Antonio “Kalohan” Conceição (2017).