Kontinua Lockdown, Konsellu Ministru Aprova Dekretu Lei Subsidiu ba Inan-Isin Rua

DILI, news-viptv.com – Governu kontinua lockdown ou Konfinamentu Obrigatóriu Jerál ba Munisipiu Dili to’o 9 Setembru 2021 Dekretu Lei ida ba Subsidiu Inan-Isin Rua ho Labarik Sira,

Kontinuasaun lockdown ne’e governu deside liu hosi Sorumutuk Konsellu Ministru iha Auditorium Ministériu Finansas nian, iha Dili no, hafoin halo análize ba aprezentasaun husi pontu situasaun epidemiolójika nasionál, husi koordenadór sira Sala Situasaun Sentru Integradu Jestaun Krize (SIJK) nian.

“Atu mantein Konfinamentu Obrigatóriu Jerál (lockdown) ba populasaun iha Munisípiu Dili, inklui ema ne’ebé maka vasina kontra COVID-19, to’o loron 9 fulan-setembru tinan 2021,” hakerek komunikadu imprensa ne’ebe publika hosi Ministeriu Presidencia Konsellu Ministru, Kuarta (1/9/2021).

Iha komunikadu ne’e esplika, ema sira hotu iha Munisípiu Dili, inklui sira ne’ebé maka vasina kontra COVID-19, kontinua hela iha uma, bele sai de’it tanba razaun Saúde, ba serbisu (iha kazu administrasaun públika, superiór ierarkiku define funsionáriu ne’ebé maka dispensadu husi dever komparénsia), atu asesu ba sasan no serbisu ba nesesidade bázika no atu simu vasina kontra COVID-19.

Taka ba públiku estabelesimentu komersiál, industriál, artezanál ka prestasaun servisu iha setór privadu ekonomia sira hotu ne’ebé dezenvolve atividade iha munisípiu Dili, ho esesaun sira ne’ebé maka prevee antes.

Kompara ho Rezolusaun anterior Rejista de’it alterasaun rua: permite atu sai husi uma ba fatin seluk hodi realiza resenseamentu eleitorál no ba parte seluk atu asegura funsionamentu ba empreza prestasaun servisu sira ba kontrolu peste nian.

La renova impozisaun Konfinamentu Obrigatóriu Jerál (lockdown) ba populasaun iha Postu Administrativu Ermera no Railaku, iha Munisípiu Ermera.

Impoin serka sanitária iha Munisípiu Manufahi, hahú husi loron 2 fulan-setembru to’o loron 15 fulan-setembru tinan 2021.

Bandu ema atu tama no sai husi munisípiu ne’e, exetu tanba siguransa públika, saúde públika, asisténsia umanitária, manutensaun sistema abastesimentu públiku ka realizasaun interese públiku.

Proibisaun hirak ne’e la abranje ba ema hirak ne’ebé maka komprova ona vasinasaun kompleta (doze rua) kontra COVID-19, nune’e mós ba labarik ki’ik sira ho idade tinan neen mai-kraik ne’ebé akompaña ema sira ne’e.

Serka sanitária sira-seluk ne’ebé sei vigora hela, la sofre alterasaun saida de’it.

Aprova Dekretu Lei ba Subsidiu Inan-Isin Rua ho Labarik Sira

Iha sorumutuk ne’e, Konsellu Ministru aprova ona projetu Dekretu Lei, ne’ebé aprezenta husi Vise Ministra Solidariedade Sosiál, Signi Chandrawati Verdiál, ne’ebé kria subsídiu ba inan isin-rua no ba labarik sira, designadu nu’udar bolsa da mãe – jerasaun foun, no ba alterasaun dahuluk ba Dekretu-Lei nu.18/2012, loron 4 fulan-abril.

Ho projetu Dekretu-Lei ida ne’e, atu reforma programa “Bolsa da Mãe”, ho hanoin atu garante katak ida ne’e bele gere impaktu signifikativu ida hodi hamenus ki’ak no ba promosaun kapitál umanu nasionál. “Bolsa da Mãe” hahú atu integra prestasaun adisionál rua, ne’ebé ho objetivu atu fó apoiu sosiál ba inan isin-rua no ba primeira infánsia, hodi hadi’a saúde no nutrisaun materna no infantil, atu promove inkluzaun ekonómika no atu fomenta ekonomia lokál.

Programa sei implementa ho forma fazeada ka progresiva, hodi asegura hanesan prioritária atuasaun iha área jeográfika ho indíse ki’ak no má nutrisaun no protesaun ba inan isin-rua no primeira infánsia. Nune’e, programa sei haluan ba teritóriu nasional tomak durante tinan 5, hahu iha tinan 2022, ho munisípiu Ainaro no Bobonaro no ho Rejiaun Administrativa Espesiál Oe-kuse Ambeno (RAEOA). Iha tinan 2023, Bolsa da Mãe – jerasaun foun sei haluan ba munisípiu Kovalima, Likisá, Manatutu, no Vikeke. Munisípiu Ermera, Baukau, Aileu no Lutem sei inklui iha programa tinan 2024 nian, ikusliu, Bolsa da Mãe sei abranje iha munisípiu Dili, iha tinan 2025.