Jiangou: TL hakarak Dezemvolve Kooperasaun Ekonomia ho Xina

DILI, www.news-viptv.com – Embaixador Xina ba Timor-Leste, Xiao Jiangou hateten Primeiru Ministru Timor-Leste, Taur Matan Ruak hakarak Timor-Leste (TL) desenvolve liu tan nia kooperasaun ho Xina iha nia relasaun bilateral.

Jiangou esplika, iha nia inkontru ho PM Taur, alende koalia kona asuntu kooperasuan ekonomia, koalia mos kona vizita Ministru Negosiu Estranjeiru Wang Yi foin lais ne´e mai Timor-Leste.

“Ohin hau iha inkontru ho ita bo´ot nia primeiru ministru atu follow up fali vizita servisu ami nia konselor estadu no ministru Wang Yi durante iha Timor-Leste, inklui akordu ne´ebe halo ona. Ne´ebe hau nia responsabilidade hodi kuidadu ba akordu hirak ne´e. Ami koalia asuntu barak izemplu, iha arikultura no infraestrutura no vida moris povo. Primeiru ministru hanoin importante tebes atu desenvolve liu tan koperasaun ekonomia iha Timor-Leste,” dehan Jiangou ba jornalista sira hafoin hasoru malu ho PM Taur Matan Ruak, Segunda (25/7/2022), iha Farol, Dili.

Iha 3-4 Junu 2022, Konsellor Esatdu no Ministru Negosiu Estranjeiru Xina, Wang Yi halo vizita servisu mai Timor-Leste hodi hametin liu tan koperasaun bilateral entre nasaun rua.

Iha nia vizita, Wang Yi konsege sai sasin ba akordu koperasaun entre Xina ho Timor-Leste iha área saúde, edukasaun no Komunikasaun Sosial.