Dili, news-viptv.com — Prezidente Repúblika no Laureadu Nobel ba Dame, J. Ramos-Horta, hato’o parabéns no kon_gratulasaun sinceru ba Sua Exelénsia Luiz Inácio Lula da Silva, tanba nia vitória iha eleisaun prezidensiál Brasil, ne’ebé hatudu katak povu Brasil fó fiar fali ba nia lideransa.
Tuir rezultadu ofisiál ne’ebé Tribunal Superior Eleitoral (TSE) Brasil publika, Prezidente Lula da Silva hetan 51,74% hosi votus válidu iha segunda volta eleisaun prezidensiál, hodi manán hosi Senadór Flávio Bolsonaro, ne’ebé hetan 48,26%. Ho rezultadu ida-ne’e, Lula da Silva halo retornu istóriku, hodi manán mandatu prezidensiál ba dala haat iha Repúblika Federativa Brasil.
Iha mensajen parabéns nian, Prezidente Ramos-Horta dehan katak rezultadu eleisaun ne’e nu’udar momentu importante ba demokrasia Brasil, ne’ebé reflete partisipasaun sivika povu no sira-nia vontade soberana ne’ebé hatudu liuhosi votasaun.
Prezidente Ramos-Horta mós hato’o esperansa katak mandatu foun ne’e sei sai períodu atu hametin instituisaun sira, promove koezaun sosiál, no dezenvolve nasaun ho inkluzaun no sustentabilidade.
“Ho naran povu Timor-Leste, ha’u hato’o parabéns ho haksolok boot ba Prezidente Luiz Inácio Lula da Silva tanba nia reeleisaun. Konfiansa ne’ebé povu Brasil fó ba nia hatudu katak demokrasia Brasil moris no forte, no reflete mós valor komún sira ne’ebé halo ita-nia nasaun rua sai belun metin.
“Timor-Leste no Brasil iha ligasaun ne’ebé metin liuhosi istória, lian no kompromisu komún ba demokrasia, solidariedade no justisa sosiál. Ha’u fiar katak, ho lideransa foun hosi Prezidente Lula, kooperasaun bilateral entre ita-nia nasaun rua sei kontinua dezenvolve no sai forte liután, atu promove dame, dezenvolvimentu inkluzivu no orden multilateral ne’ebé forte,” dehan xefi estadu iha komunikadu imprenssa, ” Tersa (27/10/2026
