Jurnalismu ba Dame, Media Labele Sai Fatin Provokasaun

DILI, www.news-viptv.com – Relasiona ho tema Konferensia Internasional The Dili Dialogue Forum kona ba Papel Media ba Futuru ida iha Paz, ne’ebe realiza husi Konsellu Imprensa Timor-Leste, Prezidenti Interinu Konsellu Imprensa, Suzana Cardoso hateten media labele sai fatin provokasaun.  

Suzana Cardoso, hatete katak jornalismu dame importante atu garante sosiedade moris iha harmonia no media labele sai fatin ba provokasaun.

“Jornalismu dame ne’e la’ós de’it kona-ba hakerek notísia, maibé oinsá ita-nia kobertura kontribui ba sosiedade nia dame no harmonia. Media labele uza hodi provoka konflitu,” hateten Suzana Cardoso, Tersa (12/05/2026), iha Salaun Multiozu, Bebora, Dili.

Konferensia internasional ne’e Konsellu Imprensa realiza hodi komemora loron aniversariu bad ala 10 no halibur jornalista, media na’in, parseiru dezenvolvimentu no instituisaun Estadu hodi diskute papél media ba dame no prevensaun konflitu..

Parseiru ba semináriu ne’e, Trosmen husi ABC Development, afirma sira-nia kompromisu atu kontinua apoia dezenvolvimentu kapasidade jornalista Timor-Leste nian hodi promove dame liuhusi kobertura ne’ebé responsavel.

“Ami orgullu apoia semináriu ne’e tanba ami fiar katak jornalista ne’ebé iha kapasidade di’ak sei sai autór ba dame no dezenvolvimentu iha Timor-Leste,” dehan Trosmen.

Provedór Provedoria Direitus Humanus no Justisa (PDHJ), Virgílio Guterres, ne’ebe sai mos orador iha konferensia ne’e hateten media tenke iha valor ba públiku no labele uza ba interese pesoál.

“Media labele sai fatin ba ema seluk atu fase sira nia ropa foer, se pajina jornal sira labele sai fatin ba ema atu mai fase sira nia foer, ita labele iha buat ne’ebe laiha valor. Ita tenki fiar katak saida mak ita hakerek, saida mak ita publika liu husi ita nia media, buat ida ne’ebe iha valor ba ita nia publiku. Ho ida ne’e deit mak ita bele kontribui ba taripas. Servisu jornalizmu ne’e laos Servisu ne’ebe fasil, dalaruma ema dehan ou nee ba intervista deit, mais nia risku ne’e ba bebeik,” dehan Virgílio Guterres.

Orador husi Indonézia, Yosep Adi fahe esperensia moruk ne’ebe akontese iha Ambon ne’ebe involve media balun hodi halo provokasaun ba entre grupu relijiaun ne’ebe rezulta konflitu no ataka malu.

“Iha Ambon uluk, media ida halo media rua: ida ba Kristaun, ida ba Muslim. Konteúdu media ne’e konvida atu halakon adversáriu, provoka leitor sira halo asaun agresivu. Ne’e mak ezemplu aat husi media bainhira uza ba ajitasaun no propaganda,” esplika Yosep Adi.

Semináriu ne’e mós fó omenajen ba jornalista internasionál Roger East no Kamal Bamadhaj ne’ebé fó sira-nia moris ba jornalismu iha Timor-Leste.