350 Delegadu Konvensaun Nasional PD Sei Hili Nia Kaniddatu ba ElPres 2022

DILI, www-news-viptv.com – Delegadu hamutuk ema 350 iha Konvensaun Nasional dahuluk Partidu Demokratico (PD) sei hili nia kandidatu hodi kompete iha Eleisaun Presidensial (ElPres) ne’ebe sei halao iha 19 Marsu 2022.

Realiza iha Salaun Leokase, Rai Kotuk – Dili, konvensaun nasional PD nian ne’e hahu ona no loke hosi Sekretariu Jeral PD, Antonio da Conceicao “Kalohan”.

“Tamba sa halo konvensaun, atktu politiku ne’ebe PD halo ne’e importante tebes ba PD ne’ebe hanaran Partidu Demokratiku atu hametin no haburas diak liu tan demokrasi iha ita nia nasaun,” dehan Kalohan, Sabadu (22/1/2022).

Iha nia intervensaun, Kalohan deklara kandidatu ne’ebe PD sei hli hodi kompete ba Elpar ne’e sei sai Prezidenti Republika ba Timoroan tomak. “Kandidatu PD diferente ho sleuk, tamba PD kandidata nia ema hodi sai prezidenti  ba povu tomak,.”

Iha konvensaun nasional dahuluk ne’e, PD realiz ahodi haburas liu tan demokrasia iha Timor-Leste tuir prinsipiu PD nian.

PD rasik iha konvensuan nasional dahuluk ne’e sei hili nia kandidatu rua ne’ebe lori ba konvensuan nasional maka Mariano “Assanami” Sabino No  Adriano Nascimento “Loromau.

Assanami dadauk ne’e asumi kargu nudar prezidenti partidu entertantu Loromau nudar prezidenti Komite Politika Nasional partidu nian.

Partido Democratico (PD) harii iha 10 Junu 2001. Tempu ne’ebe PD lidera hosi Prezidenti (Saudozu) Fernando “La-Sama” de Araujo.

Iha nia prezensa iha eleisaun Assembleia Konstituante, PD konsege hetan kadeira 7 hafoin hetan konfiansa votos hamutu 31.680.

Iha Eleisaun Parlamentar 2007, votos PD sa’e ba 46.946 no hetan kadeira 8. Iha 2007, PD hamutuk harii Governu ho Partidu CNRT, ASDT no PSD.

Iha 2012, PD mantein hetan kadeira 8 maski sira nia votos aumenta ba 48.851 no kontinua hamutuk ho governasaun Primeiru MInistru Kay Rala Xanana Gusmão.

Maski iha 2017, votos PD aumenta 55.595 iha lideransa Mariano “Assanami” Sabino, PD tenki lakon kadeira ida hosi 8 ba 7 deit, tamba hetan deit porsentazem 9.79.

Iha 2017, PD hamutuk fali ho Partidu FRETILIN harii Governu ho lideransa PM Mari Alkatiri. Maibe governasaun ne’e to’o deit fulan 8 no Prezidenti Republika Francisco Guterres Lu-Olo tenki realiza fali eleisaun antesipada.

Iha eleisaun antisipada 2018, PD sai deit opozisaun hodi kontinua kontrola ezekusaun orsamentu jeral estadu iha Parlamentu Nasional.

Ba kandidatura Prezidenti Republika, antes ne’e PD dala tolu ona fo nia figura hodi kompete maski lakon hela deit. Figura ne’e maka Saudozu Fernando “La-Sama” de Araujo (2007 ho 2012) no Antonio “Kalohan” Conceição (2017).