29 Jullu – 5 Agostu, Dezastre Estraga Uma Komunidade 28, Nain 3 Mate

DILI, www.news-viptv.com – Hamutuk uma komunidade 28 hetan estragus no ema nain 3 mate durante periodu 29 Jullu to’o 5 Agustu 2024.

Dadus ne’e fo sai husi Autoridade Protesaun Sivil (APC) iha konferensia imprensa, Segunda (5/8/2024), iha Edifisiu APC Kaikoli, Dili.

Diretor Gabinete Relasaun External no Komunikasaun (GREC-APC), Cesario Marques esplika, husi uma komunidade 28 ne’ebe relata estragus, hafoin halo verifikasaun, uma 20 deit maka tama kategoria sei hetan apoiu tuir lei ne’ebe iha.

“Uma 8 la tama iha kategoria numero afetado,” informa Cesario Marques.

Uma komunidade ne’ebe hetan estragus ne’e relata husi Munisipiu Baukau anin sobu uma 1, Bobonaru Anin sobu uma 1, Covalima anin sobu uma 3, Ermera anin sobu uma 4 no insendiu uma 1, Lautem insendiu uma 1, Liquica anin sobu uma 1 no insendiu uma 1, Manatuto anin sobu uma 2, RAEOA anin sobu uma 5 no insendu 3, no Viqueque anin sobu uma 3.

Entertantu numeru vitima mate nain 3 ne’ebe APC rejista hetan hosi ema ida mate ne’e labarik kiik ne’be mate tamba mout iha mota laran, no nain 2 seluk mate iha Dili ne’e relata husi ida labarik mate iha bis laran hafoin insendiu, no nain 1 (tinan 12) mate tamba tara an ne’ebe akontes eiha Suku Villa Verde.