27 Abril, Governu Sei Realiza Eleisaun ba Suku 10

DILI, www.news-viptv.com – Governu liu hosi Konsellu Ministru aprova data 27 Abril 2024 ba realizasaun eleisaun lider komunitaria sira iha suku foun 10.

Iha komunikadu imprensa ne’ebe redasaun asesu, Konsellu Ministru iha sorumutuk 20 Marsu, aprova ona projetu Dekretu Governu, ne’ebé aprezenta husi Ministru Tomás do Rosário Cabral, ne’ebé estebelese data ba realizasaun Asembleia Aldeia no Konsellu Suku iha ámbitu prosedimentu eleisaun lider komunitáriu sira.

Tuir kalendáriu ne’ebé aprova ona, prosesu konstituisaun meza eleitorál suku no kandidaturas ba eleisaun Xefe Suku no ninia kontensiozu, sei hala’o iha 12 abríl 2024. Períodu informasaun públika no edukasaun eleitór kona-ba prosesu eleisaun lideransa komunitária nian sei hala’o to’o 24 abríl 2024.

Eleisaun Xefe Suku ne’e sei hala’o iha 27 abríl no apuramentu ba rezultadu tenke termina iha 28 abríl 2024. Uainhira laiha kandidatu xefe suku ne’ebé maka hetan votu válidu liu metade ne’ebé fó-sai, sei realiza filafali votasaun daruak entre kandidatu rua ne’ebé hetan votu maioria iha 13 maiu 2024.

Votasaun ba eleisaun Lia na’in no Reprezentantes Juventude ba Konsellu Suku sei hala’o to’o 8 maiu ka to’o 24 maiu 2024.

Suku foun 10 sira ne’e maka iha Munisipiu Dili hamutuk 5, Aileu 2, Manatuto 2, Viqueque 1.