21 Maiu, PR Horta: Sei laiha Elementu ka Grupu Ne´ebe Derotadu 

DILI, www.news-viptv.com – Relasiona ho eleisaun parlamentar iha 21 Maiu, Prezidenti Republika (PR), Jose Ramos Horta hateten sei laiha elementu ka grupu ida ne´ebe dehan derotadu.

Xefi estadu hateten lia fuan ne´e iha nia deskursu estadu iha komemorasaun loron restaurasaun 20 Maiu ne´ebe selebra iha Palasiu Prezidensial Dili, Sabadu (20/5/2023).

“Partidu politiku ne´ebe rejistu eleisaun, hau aprezenta hau nia votos susesu. Sei iha festa, selebrasaoens, maibe sei iha karik tristeza ruma, demokrasia nune´e duni. Maibe, vida kontiua nafatin, nasaun kontinua, dezafisiu bo´ot no oportunidade bo´ot teb-tebes. Nasaun persiza ita hotu, sei laiha elementus ka grupu ne´ebe hateten derotadu, iha deit maka selebrasoens demokrasia, demokrasia ida jovem, dinamika ke iha abut ona iha kulturua identidade Timor nian,” dehan xefi estadu.

PR Horta mos fo parabens ba orgaun Sekretariadu Teknika Administrasaun Eleitoral (STAE), Komisaun Nasional Eleisoens (CNE), Polisia Nasional Timor-Leste (PNTL), FALINTIL-Forsa Defeza Timor-Leste (F-FDTL) no autoridade munisipiu no komunitaria sira nia kontribuisaun durante prosesu eleisaun parlamentar ba knar ida-ídak nian.

“Parabens ba Polisia Nasional ne´ebe ezerse sira nia funsaun ho imparsialidade profesionalismu hanesan sira halo durante tempu kampana eleitoral tomak. Nune´emos hau felisita ita nia Forsa Armadas ba imi nia apoiu ba Polisia Nasional ho imi nia prezensa deit ba Polisia Nasional garante ona seguransa,” xefi estadu felisita ba instituisaun seguransa no defeza ne´e.

Xefi estadu mos hatoo nia agradese ba Programa Nasoens Unidas ba Dezemvolvimentu (PNUD) iha resposta lais ba kontribuisuan teknika loke dalan ba realizasaun prosesu eleitoral.

Agredesementu mos hatoo ba observador internasional sira ne´ebe haruka nia delegasaun hodi observa realizasaun eleisaun parlamentar iha Timor-Leste.

“Bemvindo ba observador internaisonal, liliu ba observador Union Government Myanmar, hau espera iha futuru ne´ebe ke la naruk liu demokrasia sei fo fila fali ba Myanmar,” espera xefi estadu ba situasaun demokrasia iha Myanmar.

Nune´e mos ba Parlamentu Nasional, xefi estadu fo nia felisitasaun ba servisu deputadu/a sira iha produtividade lejislativa durante servisu V lejislatura ne´ebe hela loron hirak det sei termina nia mandatu.

“Hau felisita nai Primeiru Ministru, Jeneral Taur Matan Ruak ba ita nia governasaun, tamba hatene halo jestaun ba situasuan defisil, krizi politika, dezastre natural, pandemia COVID, funu ukrania ne´ebe iha konsikuensia ba mundu tomak, inklui ita nia rasik,” dehan xefi estdau ne´e.

Komemorasaun 20 Maiu nu´udar komemorasaun ba tinan 21 hafoin iha 20 Maiu 2002 komunidade internasional liu hosi Nasones Unidas rekonese Timor-Leste nia soberanu nu´udar nasaun independente hafoin iha 30 Agostu 1999 povu Timor-Leste liu hosi referendum deside haketak an hosi Repubika Indonesia ne´ebe “forsamente” okupa rai ne´e desde 7 Dezembru 1975 liu hosi invasaun militar maski iha 28 Novembru 1975, Timor-Leste deklara nia proklamasaun independensia liu hsoi Proklamador Saudozu Francisco Xavier do Amaral.