![banner 1000x250](https://news-viptv.com/wp-content/uploads/2024/03/BANER-KURSU-VIP.jpg" "banner 1000x250")
![banner 728x90](https://news-viptv.com/wp-content/uploads/2022/11/Efata-John-14-6.jpg" "banner 728x90")
DILI, www.news-viptv.com – Governu Republika Povu Xina kontinua hatudu nia komitmentu hodi kesi metin liu tan koperasaun ho Timor-Leste liu hosi koperasaun iha area defeza nian.
Komitmentu ne’e hatudu liu hosi prezensa Adido Defesa Xina nian iha Timor-Leste Koronel Liu Miao iha nia hasoru malu ho Vise Xefe Estadu Maior Jenerál FALINTIL-Forsa Defesa Timor-Leste (F-FDTL) Major Jenerál Calisto Santos Coliati, Kuarta (11/5/2022) ohin iha Kuartel Jenerál FALINTIL-FDTL, Fatuhada.
“Objetivu hosi hasoru malu ida ne’e, maka oinsá atu hametin diak liutan koperasaun teknika Militár, entre nasaun Timor-Leste ho China nian, liliu iha area Militár nian FALINTIL-Forsa Defesa Timor-Leste (F-FDTL) ho Forsas Armadas Xina nian iha futuru,” hakerek publikasaun offisial Relasaun Publika F-FDTL nian Kuarta ohin.
Relasaun bilaterais entre Timor-Leste ho Xina hahu kedan iha tinan 2000 wainhira Timor-Leste iha hela governasaun ONU nia lideransa liu hosi estabelesementu nia edifisiu no offisialmente hahu wainhira Timor-Leste hetan nia restaurasaun independensia iha 20 Maiu 2002.
Iha relasaun bilateral ini, Xina apoiu konstrui edifisiu Palasiu Prezidensial ne’ebe dadauk ne’e sai palasiu ba knar xefi estadu. Alende ne’e Xina mos apoiu tan kontrusaun edifisiu Ministeriu Negosiu Estranjeiru no Koperasaun, inklui ikus edifisiu ba Ministeriu Defeza no Kuartel Jeral F-FDTL.
