Xefi Estadu Portugal ho Timor-Leste Hasoru Timoroan Vitima Promesa Bosok Ajensia nian

LISBOA, www.news-viptv.com – Relasiona ona ho situasaun Timoroan ne´ebe moris mukit iha Lisboa hdi toba det iha jardim, halo xefi estadu Timor-Leste no Portugal tun deretamente hodi hasoru Timoroan sira ne´ebe dadauk ne´e hetan ona mahon iha Pavilliaun Polísia Munisipál Lisboa.

Iha hasoru malu ne´e, Prezidente Repúblika Portugál, Marcelo Rebêlo de Sousa informa estadu rua sei tuur hamutuk hodi solusiona problema no fasilita Timoroan ne’ebé hakarak servisu iha Portugal no fasilita sira ne’ebé hakarak fila ba Timor-Leste.

“Ho domin, ami laran haksolok mai iha ne’e reprezenta Estadu rua, (Portugal-Timor-Leste), ha’u hakarak halo boasvindas lori Estadu no povu Portugues nia naran, hamutuk ho Prezidente Ramos-Horta hodi buka rezolve imi nia situasaun sira hotu tuir regras hodi realiza imi nia mehi,” dehan PR Marcelo, Kuarta (2/11/2022) ba Timoroan sira ne´ebe hela iha Pavilliaun Polísia Munisipál Lisboa.

Iha hasoru malu ne´e, reprezenta Timoroan oan, Luís Ximenes hosi Munisípiu Aileu konfesa katak sira ba Portugal liu hosi ajensia ida ne´ebe promete ba sira dehan ba Portugal servisu iha.

“Ami grupu lubuk ida liu hosi ajénsia sira promete ba ami dehan bá Portugal servisu iha, maibé realidade to’o iha ne’e la iha ema ida maka fasilita ami, tanba ne’e, ami moris abandona hela iha ne’e. Ho ida-ne’e ami agradese ba PR Ramos-Horta no Prezidente Marcelo Rebêlo bele tun direita mai rona ami-nia preokupasaun hodi bele solusiona ami-nia problema,” hateten Luís Ximenes.

Nia mos husu atu estadu bele fasilita sira trata dokumentu hanesan narativa, pasaporte no seguransa sosiál, nune’e sira bele kompleta sira-nia dokumentu atu bele servisu iha Portugál.

Hosi Timoroan balun, sira informa katak prezensa sira nia iha Portugal tamba la’o ho hakarak rasik no seluk hatan katak, prosesu trata dokumentus nasionalidade ne’ebé tarde iha Embaixada Portugal iha Timor-Leste maka obriga sira foti risku.

Fatin hanesan, PR Ramos-Horta agradese bá nia homólogu Marcelo Rebelo ne’ebé hatudu domin hodi  hamutuk  tun direita halo dialogu ho foin sa’e Timor oan sira.

“Avo Marcelo uniku prezidente ida iha mundu ne’ebé hatudu nia fuan boot no domin ba ita Timor-Leste, hodi tun direita mai buka solusaun ba imi nia problema, tanba ne’e ha’u husu ba imi labele tauk, ami sei buka solusaun,” PR Ramos-Horta fó garantia.

Xefi Estadu Timor-Leste ne´e mós orienta ona autoridade seguransa Timor-Leste atu loke prosesu investigasaun ba ajénsia ilegál sira ne’ebé bosok Timoroan sira hodi ba servisu iha Portugál hodi prosesa tuir dalan legál.

Iha parte seluk, PR Ramos Horta apela ba Timoroan hirak ne’e kontinua  koopera no hatudu komportamentu di’ak ho pasiénsia, tanba estadu Portugés esforsu hela atu buka solusaun ba situasaun refere.

Xefe Estadu dehan, parte governu no autoridade seguransa Timor-Leste sei kontinua halo kontrolu makas hodi evita Timoroan sira seluk labele sai tan vítima.

Diálogu Xefe Estadu rua ho emigrante Timoroan sira-ne’e, akompaña direita hosi Ministra Negosiu Estranjerus no Kooperasaun, Adaljiza Magno no Embaixadora Timor-Leste ba Portugal, Isabel Amaral Guterres no Embaixadora Portugal ba Timor-Leste, Manuela Bairos no reprezentante governu Portugés.

Dadaun ne’e  Timoroan hamutuk na’in- 200 resin maka provizoriamente sei hela iha Pavilliaun Polísia Munisipál Lisboa Portugál no hetan asisténsia hosi Governu Portugal, liu hosi Protesaun Sivil Lisboa, no fó tratamentu saúde ba sira, hela fatin, hahán, no seluk tan hodi hein estadu rua hakotu sira-nia problema.