Xanana Dissolve Ekipa Susesu Horta

DILI, www.news-viptv.com – Prezidenti Partidu Congressu Nacional de Recontrução de Timor (CNRT), Kay Rala Xanana Gusmão dissolve ona ekipa susesu ne’ebe lori Jose Ramos Horta Eleitu ba Prezidenti Republika 2022-2027.

Ekipa ne’e Xanana dissolve tamba susesu ona lori nia misaun hodi lori Ramos Horta sai xefi estadu iha eleisaun prezidensial foin lalais ne’e.

Iha nia intervensaun Xanana husu nafatin ba ekipa susesu sei hamutuk ho nia hodi kontinua fo hanoin ba povu atu loke hanoin no hamutuk rezolve problema nasaun nian ne’ebe todan iha povu, liu hosi dalan demokrasia.

Iha seremonia agradesemenetu, Prezidenti republika eleitu, Jose Ramos Horta hatoo nia agradesementu ba ekipa susesu sira ne’ebe durante ne’e hamutuk ho nia iha prosesu eleisaun prezidensial, inklui kongratula povu Timor-Leste tomak, CNE, STAE no PNTL ho F-FDTL ne’ebe kontribui makas iha prosesu eleisaun.

Prezidenti Partidu Demokratiku, Mariano Assanami Sabino ne’ebe hamutuk ho nia partidu apoia ba susesu Ramos Horta nia hateten, vitoria Ramos Horta nudar vitoria ba povu Timor-Leste tomak.

Reporter: Leonito de Fatima I Cameraman: Justinho Mendonca