Xanana: CNRT Prosesa Kazu Fraude Eleitoral

DILI, www.news-viptv.com – Prezidenti Partido Congresso Nacional da Recontrução de Timor-Leste (CNRT), Kay Rala Xanana Gusmão kontinua prosesa STAE no CNE ba fraude eleitoral ne´ebe akontese iha Eleisaun Parlamentar 21 maiu 2023.

CNRT, esplika Xanana, prosesa STAE no CNE laos atu altera rezultadu, maibe atu hanorin jerasaun foun no futuru lideransa para labele monu tan ba problema sira hanesan akontese iha eleisaun parlamentar ne´ebe votos CNRT nian fo fali ba partidu seluk.

“Ami hakarak tau buat ne’e lori nafatin kazu ida ne’e laos atu altera rezultadu. Ami simu rezultadu, maibe ami lasimu maka fraude eleitoral ne’e hodi ho kazu ne’ebe ami sei lori ne’e para hanorin jerasaun foun hanorin futuru lideransa pais ida ne’e ninian para labele monu tan ba problema sira hanesan ne’e problema ida iha fatin ida ne´e,” dehan Xanana ba jornalista sira, Kuarta (7/6/2023) iha Palasiu Presidensial hafoin hasoru malu ho PR Ramos Horta relasiona ho formasaun IX Governu Konstitusional ne´ebe sei lidera hosi Partidu CNRT.

Votos CNRT ne´ebe fo ba partidu seluk ne´e akontese iha sentru votasaun ida ne´ebe iha mos deputadu rua CNRT nian maibe votos CNRT mamuk (zero).

“Deputadus rua iha neeba CNRT nian ho tan fiskais CNRT hetan 0. Ida ne’e ita senti katak demais, ami bolu kedas deputada Bendita no mos sira seluk katak imi la vota, imi absten fali iha imi nia sentru votasaun, CNRT hetan 0 katak votus ne’ebe CNRT hetan fo fali ba Partidu seluk ida ne’e mak ami lasimu, ami la reklama ona ami lakoi ami hakarak prosesu ne´e lao nafatin ba, maibe ida ne’e ami reklama ne’e para bele kastiga tiha ema sira ne’ebe hodi hanorin ema sira nee iha futuru rai ida ne’ebe hot-hotu tenki respeita lei iha demokrasia nia laran ema hotu tenki ezerse nia direitu labele halo buat ida hanesan ne’e, labele akontese,” kestiona prezidenti Partidu CNRT ne´e.

Eis Prezidenti Republika periodu 2007-2007 no Primeiru Ministru 2007-2015 ne´e lakohi tan kazu ne´e akontese tamba sei iha eleisoens sukus.

“Tanba ne’e iha kampanas ita boot sira rona katak hau temi bebeik desentralizasaun. Eleisoens tenki kurizi agora para labele akontese iha futuru Iha fraude eleitoral sira ne’e bolu krimi, ida ne’e maka ami sei foti,” nia dehan.

Eis Komandante das FALINTIL ne´e mos esklarese katak nia prezensa iha PR Horta hanesan inkontru informal ne´ebe xefi estadu bolu partidu mais votadu hodi koalia formasaun governu.

“Prezidenti komvida inkontru informal, informal tamba CNRT sai hanesan partidu vensedor ne’ebe mai troka eleisoens husu dehan atu lao oinsa ne’e maka sekretariu Jeral partidu CNRT ba tiha iha Sede Partidu Demokratiku (PD) koalia ona ne’ebe partidu 2 ne’e koa’lia ona, mais ne’e sei informal, formal loloos ne’e depois de primeira sesoens de lejislativa hosi Parlamentu Nasional foun ne’e maka ita bele dehan katak formal ona,” dehan Xanana.

Iha eleisaun parlamentar 21 Maiu, CNRT hetan kadeira 31 no sei forma govenru koligasaun hamutuk PD ne´ebe hetan kadeira 7. Entertantu Koligasaun Plataforma FRETILIN hetan deit kadeira 19, KHUNTO 5 no PLP 4.