Vizita Xefi Estadu ba Kambodia, Sei Hametin Liu Tan Amizade

DILI, www.news-viptv.com – Prezidenti Republika Jose Ramos Horta, Tersa dadersan husik ona Timor-Leste hodi halo vizita estadu ba Reinu Kamboja durante loron tolu hahu 19 toó 21 Outubru 2022.

Vizita xefi estadu ba reinu Kamboja hodi hatan konvite Nai Liurai – Sua Majestade Preah Bat Samdech Preah Boromneath Norodom Sihamoni.

Vizita Estadu ba Reino Kamboja ne’e ba Prezidente Ramos-Horta nudar vizita daruak. Vizita  dahuluk Prezidente Ramos-Horta halao iha tinan 2011,  iha  mandatu prezidensiál tinan 2007-2012 .

Hosi nebá kedas maka realiza ona interkambiu vizitas Alto nivel lubuk ida no beibeik entre nasaun rua ne’e, inklui mos Vizita Ofisiál Xanana Gusmão, wainhira kaer knaar Primeiro-Ministro, iha tinan 2013 .

Iha tinan 2016, Vizita Ofisiál Samdech Akka Moha Sena PadeiTecho Hun Sen, Primeiro-Ministro  Reino Kamboja mai Timor.

Kamboja no Timor-Leste iha no halao relasoens ne’ebe diak tebes. Núdar aktual Prezidente ASEAN nian, Kamboja dadaun ne’e sai mos nudar defensor forte bá adezaun Timor-Leste ba membru ASEAN.

Vizita ne’ebe atu halao dadaun ne’e sei sai nudar oportunidade diak hodi reforsa no hametin liu tan parseria no amizade entre nasaun rua ne’e, no explora formas atu aumenta tan koperasaun iha matéria  ba dezenvolve ekonomia , seguransa ai-han, konektividade aviasaun, troka konabá komersiu nian, partilha experiénsias iha sektor minarai no mos konaba inisitativa regional sira,  entre matéria sira selu tan.

Durante Vizita Estadu ne’e mos, Prezidente Ramos-Horta sei halao reuniaun  ho Sua Majestade Liurai, ho Primeiro-Ministro Hun Sen, no kortezia ba Prezidente Senado ba housi Prezidente Assembleia Nacional Reino Camboja nian.

Prezidente nia ponto kulminante maka sei ba koalia iha universidade tolu (3), tuir mai iha nebá sei simu kondekorasaun iha “Doutoramento Honoris Causa iha Administração no Liderança Educativa” no ida fali iha “Professor Honorário Distinto de Relações Internacionais”.

Iha Vizita Estadu ida nee mos sei akompanha housi sektor privadu Timor Leste nian no komunidade emprezarial, no iha neba sei partisipa iha Fórum Emprezarial ida ne’ebe maka organiza housi Ministeirio dos Negocios Estangeiros no Kooperasaun no Embaixada Timor-Leste iha Reino Kamboja,  ein parseria-servisu hamutuk ho Câmara de Comércio Kamboja nian no ho Trade Invest Timor-Leste.

Prezidente Ramos-Horta sei fila fali mai Timor-Leste iha 23 Outubro de 2022.