Vasina ona, Ema 65 Pozitivu COVID-19

DILI, news-viptv.com – Sentru Integradu Jestaun Krize (SIJK) informa ema nain 65 ne’ebe simu ona vasina kontra COVID-19 detetadu pozitivu COVID-19.

Hosi nain 65 ne’e, ema nain 49 maka simu ona vasina kompletu no nain 26 maka foin simu vasina doze dahuluk.

Kodenador Forsa-Tarefa ba Prevensaun no Mitigasaun Surtu COVID-19 iha Timor-Leste, Dr. Rui Maria de Araujo esklarese, kazu foun relata ohin (29/8/2021) iha nain 166. Ne’ebe hosi Dili nain 119, Aileu 13 no Munisipiu seluk 34.

“Husi totál kazu detetadu foun ohin, kazu 65 ka 39,1% maka sintomátiku (hatudu sintomas) husi kazu detetadu foun ohin,49 (30%) simu ona vasina kompletu, 26 (16%) simu ona vasina doze dahuluk,” informa Dr. Rui Araújo liu hosi komunikadu imprensa ne’ebe publika.

Iha komunikadu ne’e mos informa ema nain 132 maka rekoperadu hosi COVID-19 no kazu ativu dadauk ne’e hamutuk 4.554. Totál komulativu kazu konfirmadu desde tinan kotuk to’o agora 16.402.

“Óbitu ne’ebé relata ohin, 29 agostu 2021 iha nain 3. Mane, idade tinan 70, Timoroan, hela iha Dili, vasina seidauk kompletu, iha 20 Agostu 2021 diagnóstikadu iha HNGV ho sindroma insufisiénsia respiratória aguda (SIRA) tanba COVID-19. Iha loron ne’e kedas matebian hala’o tratamento iha Lahane tuir protokolu ne’ebé iha. Matebian is-kotuhorikalan 20h20, tanba respiratoric failure/parajen respiratória,” esplika Dr. Rui ba obitu dahuluk nian.

Entertantu Mane ida ho idade tinan 89, Timoroan, hela iha Dili, seidauk vasina, iha 22 Agostu 2021 diagnóstikadu iha HNGV ho sindroma insufisiénsia respiratória aguda (SIRA) tanba COVID-19. Iha loron ne’e kedas matebian hala’o tratamento iha Vera Cruz tuir protokolu ne’ebé iha. Matebian is-kotu horikalan 22h30, tanba respiratoric failure/parajen respiratória.

Hosi Izolamento Maliana, SIJK relata Mane 1, idade tinan 72, Timoroan, hela iha Maliana, seidauk vasina, iha 27 Agostu 2021 diagnóstikadu iha Maliana ho sindroma insufisiénsia respiratória aguda (SIRA) tan ba COVID-19. Matebian sofre mós moras kankro próstata ho metastaze ba orgaun seluk iha isin. Iha loron ne’e kedas matebian hala’o izolamentu iha Maliana. Matebian is-kotu horikalan 19h00, tanba multiple organ faiure/falénsia orgaun barak.

“Totál Óbitu iha Timor-Leste 62,” informa Dr. Rui Araujo.