Vasina COVID-19 Kuarta Doze Prioridade ba Pessoal Saude, Grupu Vulneravel no Jornalista

DILI, www.news-viptv.com – Ministra Saude dr. Odete Maria Freitas Belo informa katak vasina COVID-19 kuarta doze nian dadauk ne´e fo prioridade uluk ba pessoal saude no grupu vulneravel ou moras atan sira no ba mos jornalista sira.

Ministra Saude deklara asuntu ne´eba jornalista sira wainhira partisipa iha programa Walk the Talk , sabadu (14/1/2023) iha Kampu Futebol Komoro, Dili, ne´ebe realiza ho objetivu hodi selebra kampana nasional integradu imunizasaun rutina, vitamina A, intrudusaun Vasina Pneumococcal (PCV), imunizasaun Ai-moruk kontra Lumbriga, nomós vasina Covid-19 ba ema ho idade tinan 12 ba leten.

“Kuarta doze ami fo nafatin prioridade ba pessoal saude sira, ba ema sira ne´ebe, ezemplu ita boot sira (jornalista, red.) proezemplu iha kontaktu besik ho ema, ba ema ne´ebe vunerabel ka moras atas sira, moras sira mos tenki simu vasina ida ne´e, maibe ba ema sira ne´ebe sente hakarak simu, ministeriu saude prontu atu fo,” dehan Ministra Saude.

Kampana nasional integradu ne´e rasik Ministeriu Saude offisialmente lansa ona iha loron 12 Janeiru 2022.

Kampaña vasinasaun integradu sei foka ba labarik hotu-hotu iha Timor laran tomak ho idade tinan 5 mai kraik, no ida ne’e importante tebes ba labarik sira hotu, tanba bele ajuda hasa’e imunidade no prevene labarik sira husi hetan moras.

Vasina ne’ebé sei fó durante tempu kampaña nasionál mak hanesan: vasina pólio, sarampu no rubella ne’ebé sei ajuda protejeita-nia oan sira husi moras ne’ebé kauza husi polio, sarampu no rubella. Fahe vitamina A, ida-ne’e sei ajuda mantein sistema imunidade ne’ebé forte, hamenus insidénsia ba moras diareia, sarampu iha labarik no prevene matan aát no tilun diuk. Fó ai-moruk kontra lumbriga.

Introdus vasina foun naran PCV ka vasina Pneumoccocal, ida-ne’e sei fó protesaun ba bebé no labarik kiik sira kontra moras pneumonia ne’ebé kauza husi infesaun bakteriana ida.

Ba labarik idade 12 ba leten, sei simu vasina Covid-19 pelumenus vasina doze rua, no vasina doze booster ba ema idade 18 ba leten.