Urjenti, Timor-Leste Persiza Estabelese Sentru Rehabilitasaun Juvenio

DILI, www.news-viptv.com – Aktus krimi ne’ebe involve foinsa’e iha Timor-Leste, urjenti duni atu Timor-Leste estabelese ona Sentru Rehbailitasaun Juvenio.

Provedor Diretus Humanus no Justisa, Virgilio da Costa Guterres hateten ho situasaun foinsa’e sira iha krime ne’ebe ikus tribunal labele julga tamba lei la fo dalan, loke ona hanoin Timor-Leste persiza duni Sentru Rehabilitasaun Juvenio ba idade foinsa’e sira.

“Situasaun involvimentu joven sira iha krime, maibe ba tribunal lei resimputabilidade labele julga, entaun ikus mai Komunidade sira senti injustisadu lakon familia, tanba lei la fo sansaun ba ema ne’ebe envolve iha laran, iha lei joven menoridade labele julga ho lei ida ne’e, iha nesidade urjenti atu estabelese sentru rehabilitasaun juvinio,” dehan Virgilio ba jornalista sira hafoin entrega relatoriu annual tinan 2023 PDHJ nian ba Prezidenti Parlamentu Nasional, Maria Fernanda Lay, Sexta (7/6/2024), iha uma fukun Parlamentu Nasional, Dili.

Provedor Virgilio mos esplika, nia parte mos koalia ho Prezidenti Parlamentu Nasional hodi hare’e mos ba Lei protesaun testamunia.

“Depois troka mos opiniaun konaba preokupasaun Timor Leste instituisionaliza protesaun testamunia, lei ne’e iha, maibe to’o agora seidauk hatene ministeiru ida ne’ebe mak atu implementa lei ne’e, tanba iha advokasia boa governamental nian, dalaruma iha informasaun atu hato’o, maibe ema tauk tanba laiha protesaun ba sira nian moris,” dehan Virgilio.