UPF Kaer Sidadaun 1 iha Tilomar Lori Kilat

COVALIMA, news-viptv.com – Komandu Polísia Nasionál Timor-Leste (PNTL) liuhusi Unidade Patrullamentu Fronteira (UPF) postu Foholulik kaer sidadaun 1 tamba lori kilat anin.

Sidadaun ne’e ho naran inisial SJ husi Aldeia Foholulik, Suku Beiseuk, Postu-Administrativu Tilomar, Munisipiu Covalima.

Komandante UPF, Superintendente Euclides Belo, deklara sidadaun ne’e UPF kaptura liuhusi operasaun rutina iha fronteira terrestre Timor-Leste ho Indonézia.

“Iha oras tuku lima loraik ne’e ita asegura sidadaun CJ no prende mos kilat anin lolon 1 ho marka AESE 92 hamutuk ho nia nain iha area Postu Administrativu Tilomar, tanba sidadaun ne’e kontra ona lei númeru 5/2017 kona-ba arma branka nian,” dehan Euclides Belo iha komunikadu imprensa ne’ebe publika hosi Servisu Relasaun Publika Ministeriu Interior dadersan ne’e, Domingu (5/9/2021).

Euclides hateten, nia membru sira halo ona identifikasaun no entrega ona sidadaun ne’e hamutuk ho objetu ne’ebe UPF prende ba Komandu PNTL Munisipiu Covalima hodi halo prosesu investigasaun hodi prosesa tuir lei.

“Ohin madrugada tuku 6 dader ne’e mos ami halo mos aprensaun ba sidadaun feto ida ho naran inisial SnR ho motorizada tula mos nia oan sei kik tanba lori tabaku sek bantal hamutuk 9,” nia informa. Euclides hatutan, horiseik to’o ohin loron UPF kompanhia Bravo Covalima servisu koletivu halo nafatin patrulla kalan no loron hodi kontrola liña fronteira liu-liu hare ba sidadaun sira ne’ebe tama ilegal inklui sira ne’ebe halo transaksaun ilegal.