Timor-Leste Rejista ona 100 Mate ho COVID-19

DILI, news-viptv.com – Timor-Leste ohin rejista ona ema mate 100 ho COVID-19 desde kazu mate dahuluk rejista iha 6 Abril 2021.

Liu hosi komunikadu imprensa ne’ebe publika hosi Sala Situasaun – Sentru Integradu Jestaun Krizi (SS-SIJK) Kuarta (15/9/2021), tuku 17h30, relata tan numeru obitu nain 2 ne’ebe mai hosi Kapital Dili.

Obitu nain 2 ne’e maka Mane, idade 44, hela iha Dili, vasina seidauk kompletu, iha 13 setembru 2021, diagnóstikadu ho sindroma insufisiénsia respiratória aguda (SIRA) tanba Covid-19. Matebian sofre mós moras Asidente Vascular Cerebral (AVC) iskémiku. Matebian hala’o tratamentu iha Vera Cruz, maibé is-kotu horiseik loraik 15h20.

“Mane, idade 68, hela iha Dili, seidauk simu vasina, iha 14 setembu 2021, diagnóstikadu ho sindroma insufisiénsia respiratória aguda (SIRA) tanba Covid-19 iha HNGV. Iha loron ne’e is-kotu, iha lorokra’ik 17h25. Familia kolabora ho ekipa saúde, hodi hala’o funeral tuir protokolu ne’ebé adopta iha Timor-Leste,” informa Koordenador Forsa-Tarefa ba Prevensaun no Mitigasaun Surtu COVID-19 iha komunikadu ne’e.

SIJK ba ohin loron relata ema nain 71 maka pozitivu tan COVID-19. Numeru ne’e mai hosi Dili nain 34, Baucau 11 no Munisipiu seluk 26.

Husi totál kazu detetadu foun ohin, kazu 56 (78,9%) maka sintomátiku (hatudu sintomas). Entre pursentazem ne’e, 18 (25%) simu ona vasina kompletu no 8 (11%) simu ona vasina doze dahuluk.

Iha informasaun seluk, SIJK mos informa iha ema nain 256 maka rekopera ona hosi virus refere no hatun numeru kazu ativu ba ohin loron hamutuk 2.756.

Ho numeru obitu ne’ebe aumenta kada loron, SIJK husu ba populasaun atu tuur hakmatek iha uma laran wainhira laiha atividade ruma no hakbesik an ba fasilidade ka ospital ou sentru saude sira wainhira sente isin-manas, kakorok moras, inus-ben, ka mear, hodi bele hetan atendimentu husi profisionál saúde sira. Wainhira sedu liu hatene se virus ne’e kona ita ka la’e.

Apela mos ba populasaun iha Timor-Leste laran tomak, favór respeita nafatin regra prevensaun no ijiéne individuál ne’ebé Governu hatuur ona atu prevene moras Covid-19 da’et ba mai.

Desde 21 Marsu 2020, Timor-Leste konfirma ona ema nain 18.786 maka konfirmadu ba COVID-19 no ema nain 15.930.