Timor-Leste ho Australia Koalia Hasa’e PALM ba Traballador Timoroan

DILI, www.news-viptv.com – Timor-Leste ho Australia koalia tan oportunidade servisu ba traballador Timoroan liu husi hasa’e Programa Mobilidade Traballadór Pasífiku Austrália nian (PALM).

Diskusaun PALM ne’e halo iha inkontru entre Prezidenti Republika (PR) Jose Ramos-Horta ho Tony Burke nu’udar Ministru ba Asuntu Interior, Ministru ba Imigrasaun no Asuntu Multikulturál, Ministru ba Seguransa Sibernétika, Ministru ba Arte, no Líder ba Kámara iha Parlamentu Australianu nian, Tersa (28/1/2025), iha Palasiu Prezidensial.

“Inkontru ne’e ko’alia kona-ba área xave sira kona-ba hasa’e PALM nian, espansaun oportunidade ba servisu temporáriu no dalan edukasionál liuhusi bolsa estudu no formasaun profisionál, hametin mekanizmu monitorizasaun kondisaun servisu ba traballadór Timor-oan sira iha Austrália, no inisiativa interkámbiu kulturál ne’ebé planeia atu selebra Timor-Leste nia integrasaun ASEAN durante tinan 2025,” sita komunikadu imprensa husi Gabinete Servisu Komunikasaun Sosial Prezidensia Republika ne’ebe redasaun simu.

Prezidente Ramos-Horta subliña papél importante husi remisaun sira husi traballadór Timor-oan sira iha Austrália hodi apoia família sira no kontribui ba dezenvolvimentu nasionál, hodi husu espansaun husi programa sira ne’ebé eziste ona ho aumentu oportunidade ba kolokasaun nian.

“Austrália hatudu konsistente nu’udar parseiru ida-ne’ebé metin iha Timor-Leste nia viajen ba dezenvolvimentu no prosperidade. Espansaun husi programa mobilidade traballadór nian no hametin ligasaun kulturál sira sei aprofunda liután ligasaun entre ita-nia nasaun, hodi fó benefísiu ba ita-nia povu rua ne’e. Ami hakarak kontinua harii oportunidade sira-ne’e, partikularmente bainhira Timor-Leste tama iha kapítulu foun ida ho nia adezaun ba ASEAN,” dehan Prezidente Ramos-Horta.

Governu Australianu reafirma nia kompromisu hodi proteje direitu sira traballadór nian, ho mekanizmu sira ne’ebé di’ak liu atu monitoriza kondisaun serbisu nian no asegura kondisaun sira ne’ebé hanesan ba serbisu sira ne’ebé hanesan ba traballadór Timor-oan sira iha Austrália.

Ministru Burke subliña kompromisu Austrália nian ba relasaun bilaterál, hodi destaka lasu amizade ne’ebé kle’an entre nasaun rua ne’e no sira-nia vizaun hamutuk ba estabilidade no prosperidade rejionál.

Enkontru ne’e hetan partisipasaun husi ofisiál prinsipál sira husi nasaun rua, inklui Ministru Negósiu Estranjeiru no Kooperasaun Timor-Leste, Bendito Freitas, Ministru Interior, Francisco Guterres, Embaixadór Austrália nian iha Timor-Leste, Caitlin Wilson.