Servi Lolos ba Estadu, Membru PNTL nain 71 Entrega Atributu OAM

Publika iha pajina offisial Ministeriu Interior iha Facebook (Serviços Relaçoes Públicas), Membru PNTL nain 71 ne’e kompostu hosi Komandu Munisipiu Baucau hamutuk 41, Komandu Munisipiu Lautem na’in 6 no Komandu Munisipiu Manatuto hamutuk na’in 24, no mai hosi Persaudaran Setia Hati Terate (PSHT), Ikatan Kera Sakti (IKS) no Kmanek Oan Rai Klaran (KORK).

“Ohin ita halo serimonia importante ida katak imi atu asegura lei no ordem hodi proteje povu hosi kualker asaun ne’ebe estraga povu ida ne’e. Estadu investe ba PNTL atu servisu ho neutru iha asaun hodi defende povu no estadu ida ne’e. Imi hamrik iha ne’e atu hatudu ba ema hotu katak imi serve deit estadu ida ne’e,” hateten Ministru

Francisco iha nia deskursu.

Tuir nia, asaun ida ne’e atu hatudu ba povu katak PNTL mak lutu nasaun nian hodi tau matan ba estabilidade rai nian.

“Ohin imi hatudu ona lealidade imi nian hodi rei bandeira ne’ebe ema mate barak para ohin loron ita hotu hamrik iha ne’e. Entaun ohin ita halo serimonia ne’e hodi afirma katak imi servisu atu defende deit povu ida ne’e. Imi daudaun afirma lolos pozisaun hodi leal deit ba estdu laos ba fali kulaker ema politika ka organizasaun seluk.

Governante ne’e husu atu membru PNTL sira ne’ebe envolve an iha grupu arte marsiais atu servisu deit ba povu nune’e ema labele prega tan buat oioin ba membru PNTL sira.

“Mantein disiplina respeita hirarkia, kumpri deit ordem komandu nian tanba imi nia objetivu final maka lei no ordem para povu ne’e halo atividade produtivas hodi hetan netik buat ruma. Para ona oho malu tanba ita mate rihun atus rua resin lalika tan mate ona tanba deit problema kik ita baku no oho malu. Imi tenke afirma ida ne’e ba povu”, afirma.

Membru governu ne’e mos agradese ba Komandu Jeral PNTL no Prezidente Komisaun Reguladora Arte-Marsiál (KRAM), ne’ebe ezekuta despaisu Ministeriu Interior nian atu identifika membru PNTL sira ne’ebe envolve iha organizasaun arte marsiais no arte rituais hodi halo desvinkulasaun no serve los deit ba povu no nasaun.

Marka prezensa iha seremonia ne’e Segundu Komandante Jerál, Komisáriu Pedro Belo, Prezidente KRAM, Octaviano da Conceição, Komandante Munisipiu sira hosi Baucau, Lautem no Manatuto, Provedoria dos Direitus Umanus e Justisa (PDHJ) rejional Baucau, Sub KRAM Munisipiu sira, veteranus, lider relijiozu, Autoridade lokal no-mos lider Arte Marsiais no Arte Rituais sira.