Selebra 20 Maiu, Governu “Fakar” US$ 350,000 ba Atividade iha Dili

DILI, www.news-viptv.com – Governu iha tinan ne´e selebra deit loron restaurasaun independensia 20 Maiu iha Kapital Dili no “fakar” orsamentu US$ 350.000 hodi apoia deit atividade feira no divertementu iha Dili.

“Orsamentu ba atividade sira ne’e ho feria sira ne’e hotu remata total ba orsamentu ne’e 350 mil,” informa Vise Ministru Administrasaun Estatal, Lino Torezão ba jornalista sira hafoin hsoru malu ho Prezidenti Republika, Jose Ramos Horta, Segunda (15/5/2023) iha Palasiu Prezidensial Dili.

Feira ne´ebe halo iha Kapital Dili konsentra iha Postu Administrativu Dom Aleixo, Cristo Rei, Metinaro no Portu Dili nu´udar sentru ba selebrasaun divertementu nasional nian ne´ebe hahu ona nia atividade desde 4 Maiu 2023.

Ba munisipiu sira, vise ministru ne´e esplika, governu la tau orsamentu hodi halo atividade selebrasaun.

“Ba iha munisipiu sira sei la halo serimonia, ne’e mak ohin ha’u hateten ne’e serimonia 20 de maio agora ne’e lahanesan ho 20 de maio ne’ebe mak liu ona ba tanba iha atividade. Orsida sei iha 20 de maio ne’e sei iha mos distribuisaun de material sensitivu no mos naun sensitivu ba eleisaun parlamentar ninian. Ne’ebe iha munisipiu sira hasa’e bandeira loos deit ema nain tolu 3, ida ba hasa’e bandeira hatun sira hotu-hotu partisipa ona distribuisaun material sensitivu no mos naun sensitivu ba iha fatin hotu-hotu,” esplika vise ministru ne´e.