SEA Games 2023, CONTL: Kondisaun Limitadu, Labele Obriga Atleta Lori Medalla

DILI, www.news-viptv.com – Hare ba preparasaun no kondisaun ne´ebe limitadu liliu ba orsamentu preparativu, Comitte Nasional Olimpiku Timor-Leste (CONTL) husu ba governu labele obriga atleta fila lori medalla wainhira partisipa iha SEA Games 2023 Kambodia.

Sekretariu Jeral CONTL, Laurentino Guterres hateten, iha SEA Games 2019 Filipina, Timor-Leste liu hosi nia atleta Boxing no Taekwondo konsege oferese medalla ba Timor-Leste, maibe iha SEA Games tinan ne´e iha Kambodia, la hetan medalla mos pilemenus hatudu atetude diak nu´udar embaixador.

“Hau hanoin iha experensia iha tinan kotuk liu ba modalidade boxing noTaekwondo, maibe ita mos tuir kondisaun. Agora la bele obriga ita nia atleta sira tenke lori medalla tamba kondisaun nebe preparasaun durante nee klaru no orsamentu neebe mediu ita halo preparasaun maximu ona ba sira maibe ita nia kondisaun real ne´ebe mak iha mos ita tenke onestu,” dehan Laurentino ba jornalista sira hafoin aprezenta delegasaun Timor-Leste ne´ebe sei partisipa ba Kambodia ba Prezidenti Republika, Tersa (2/5/2023), iha Palsiu Presidensial Aitarak Laran, Dili,

Total ema hamutuk 103 maka iha delegasaun ne´ebe sei partisipa iha SEA Games ne´ebe kompostu hosi atleta no offisial ema nain 90. Modalidade ne´ebe partisipa maka Futebol, Taekwondo, Boxing, Volly Praia, Karatedo, Atletismu, Siklismu, Soft Tenis, no e-Sport.

Iha SEA Games 2023, Governu liu hosi Sekretaria Estadu Joventude no Desportu aloka orsamentu US$ 147.000.

“Hosi osan ne´e, kada atleta hetan osan saku US$ 46 loron ida,” nia dehan

Prezidenti Confederasaun Desportu Timor-Leste (CDTL), Macario Sanches esplika iha preparasaun CDTL hetan alokasaun orsamentu US$ 82.000 ne´ebe orsamentu ne´e uza durante atleta tama kazerna ba sira nia hahan, farda no nesesidade seluk.

Entertantu, Prezidenti Republika Jose Ramos Horta husu ba atleta sira atu hatudu komportamentu diak durante kompete iha SEA Games 2023.

“La lori medalla la buat ida, importante maka lori Timor-Leste nia naran morin iha mundu,” dehan Xefi Estadu ba atleta sira.