Sai Vitima, Komunidade Luka Lamenta Konstrusaun Ponte Uelolo

DILI, www.news-viptv.com – Komunidade Luka iha Munisipiu Viqueque lamenta ho kontrusaun Ponte Uelolo ne’ebe abandona hosi emprezariu ne’ebe responsabiliza ba obra refere.

Xefe Aldeia Uma-Boot, Suku Luka Germeias Marques informa nu’udar autoridade lokal mos lamenta ho kompana ne’ebe kaer obra ba konstrusaun Ponte Uelolo ne’ebe laiha kontinuasaun no ikus halo komunidade maka sai vitima tamba tenki simu sofre be’e sa’e wainhira tempu udan.

“Hanesan autoridade lokal nia haree katak sira mai sobu tiha ponte depois sira abandona tiha ne’e fo susar de’it mai ami komunidade kompaña sobu ponte ne’e Outubru tuir informasaun ne’ebe ami hetan ne’e katak sira sobu tiha atu halo foun fali no mota ne’e sira atu halo penahan sor-sorin hodi satan bee ne’e, maibe depois de sira sobu tiha la iha kontinuasaun,” hateten Germeias Marques ba jornalista VIP TV, Sexta  (26/01/2024) via telefone.

Autoridade ne’e mos ezise  ba nain ba konstrusaun ne’ebe labele dada tempu maibe tenki aselera ona nune’e komunidade refere bele asesu ba mai hodi la bele difikulta ba transporte públiku no transporte privada sira.

“Ami komunidade iha fatin ne’e ami sente araska los tamba foin mMota boot ne’e, bee nakonu iha komunidade sira nia uma no dalan sira ne’e liu la di’ak komunidade atu asesu ba mai la di’ak, eskola ona sira atu ba eskola mos la di’ak, ema atu ba hospital mos la di’ak tamba ne’e ami haruka kompaña sira atu taka fila-fali bee dalan mos sira dehan hatan mai ami dehan mina la iha no mos iha armazen ne’e traballador ida deit maka servisu,” dehan xefi aldeia ne’e

Laos deit sira fo sofrimentu ba komunidade nia uma kuaze 50, maibe komunidade Aldeia Uma-Boot nian natar kuaze hectare 45 mos hetan estragus no labele halo atividade natar laran durante tinan 4 ona.

“Durante ne’e bee halai ses husi mota ne’e konsege estraga ona ami nia natar foho rua kuaze 45 hektare mota sobu ona 20 hektare tamba ami aldeia Uma-Boot la bele halo natar durante tinan 4 ona,” haktuir Marques.

Ponte Uelolo lokaliza iha Aldeia Uma-Boot Suku Luka  Postu Administrativu Viqueque Munisipiu Viqueque hahu 2019 to’o ohin loron difikulta mos ba transporte públiku no privadu sira enkuantu estraga refere liga ho Postu administrativu Natarbora Minisipiu Manatutu.

Antes ne’e, maski governu anterior konsege monta ona penahan, maibe mota bo’ot iha tempu udan, sempre sobu rahun hodi be’e halai ses hosi diresaun mota nian.