RTTL, E.P Host Media ba Jogos Desportivas CPLP 2025

DILI, www.news-viptv.com – Empreza Publiku Radio Televizaun Timor-Leste (RTTL, E.P) sei sai host media ba eventus desportu internasional, Jogos Desportivas CPLP 2025 2025 ne’ebe sei partisipa husi membru nasaun Lingua Portugues sira.

Nu’udar media estatal, Jorge Soares Cristovão nu’udar Koordenador Jeral ba Eventus Konferensia Ministru Juventude no Desportu CPLP no mos Jogos Desportivas CPLP 2025, atual Sekretariu Estadu Arte no kultura hateten, Komisaun Organizadora desidi ona atu fo transmisaun dereta ba jogos hotu CPLP 2025 ba RTTL, E.P ne’ebe antes ne’e susesu ona ba eventu Vizita Papa Francisco iha Setembru 2024.

Hodi offisializa estatutu RTTL, E.P nian ne’e maka, Kinta (20/3/2025), Komisaun Organizadora realiza inkontru kordenasaun ho Prezidenti RTTL, E.P, Elizeu Isaac Fernandes ho nia tekniku sira.

“Parte komisaun organizadora tempu badak sei fo sai atu indika RTTL nu’udar Host Broadcast ba ita nia atividade jogus CPLP ida ne’e. Tamba ida ne’e maka media sira sei servisu hamutuk ho RTTL para kanalizasaun informasoes jogus CPLP sei lao husi dalan ida nian,” informa Jorge Cristovão ba jornalista sira iha Sekretariadu Jogos CPLP 2025, CCD Kaikoli, Dili.

Prezidenti RTTL, E.P, Elizeu Isaac Fernandes hateten, wainhira RTTL, EP sai official ba Host Media,   iha Broadcasting nian, RTTL, E.P mos pronto atu fo out put ba media nasional no internasional sira hodi bele mos halo transmisaun.

Alende ne’e, Komisau Organizadora mos aloka orsamentu publisidade nian ba media nasional seluk ne’ebe durante ne’e iha ona kooperasaun ho SEKOMS hodi bele mos halo promosaun ba Jogos CPLP 2025.

“Konteudo ka ninia output wainhira jogu ne’e lao bele mos halo notisias iha sira nia media rasik, no oinsa atu bele media sira fo live streaming bele mos hetan output ba ida ne’e,” esplika Elizeu.

Orsamentu ne’ebe aloka ba RTTL, EP, Komisaun Organizadora aloka US$ 50,000.