Rekonese Luta Frente Diplomatika, KKLN Husu PR Horta Forma Ekipa

DILI, www.news-viptv.com – Konsellu Kombatente Libertasaun Nasional (KNKLN) husu ba Prezidenti Republika (PR) Jose Ramos-Horta atu forma ekipa ida hodi servisu hamutuk atu rekonese luta  Frente Diplomatika no Relasaun Externa sira durante tempu resistensia Timor-Leste ba independensia.

Vise Prezidenti KKLN, Marito Reis esplika, ekipa ne´ebe sei forma hosi PR Ramos-Horta ne´ehodi halo verifikasaun validasaun ba kestionaria sira ba frente diplomatika no relasaun externa.

“Hanesan mos iha rai laran, agora dadauk halo mos hela verifikasaun validasaun ba frente klandestina,” dehan Marito Reis ba jornalista sira hafoin hasoru malu ho xefi estadu, Kinta (27/10/2022), iha Palsiu Presidensial Bairo Pite, Dili.

Alende koalia assuntu refere, KKLN mos mensiona kona ba kondekorasaun ba agresiadu sira ne´ebe atu simu iha komemorasaun loron proklamasaun 28 Novembru.

“Hosi PR nia ekipa prepara hela atu kondekora sira agresiadu nain 21 pessoas,” informa Maritor Reis.

Ba Timor-Leste tomak, hosi hasoru malu ho xefi estadu, husu ba KKLN atu kondekora membru sira ba ida-idak munisipiu. Sira ne´ebe sei simu kondekorasaun kada munsipiu hamutuk iha nain 50.

“Ne´ebe total hamutuk ema nain 650. Maibe tamba Covalima balun simu ona, hela nain 28 maka sedauk simu ne´ebe total iha 28 Novembru ne´ebe sei simu iha 628,” nia esplika.

Tamba komemorasaun 28 Novembru tinan ne´e ba nivel naisonal halo iha Munisipiu Manatuto, agresiadu nain 50 Manatuto aumenta nain 21 hosi ekipa PR nian maka sei simu iha seremonia ne´e.