Rekonese Dedikasaun no Empenu, Governu Fo Doasaun Veikulu Motorizada ba Xefi Suku Sira

DILI, www.news-viptv.com – Hodi fo rekonesementu ba dedikasaun no empenu xefi suku sira durante sira nia mandatu, Governu desidi fo doasaun veikulu motorizada ba xefi suku sira.

Doasaun ne’e Governu desidi liu hosi Konsellu Ministru ne’ebe aprova ona Projetu Rezulusaun Governu kona-ba doasaun veíkulu motorizada ba xefe suku sira ne’ebé ezerse ona mandatu iha períodu tinan 2016-2023.

“Hanesan rekoñesimentu ba dedikasaun no empeñu husi Xefe Suku ne’e sira ne’ebé mandatu remata ona iha loron 28 Novembru 2023, ba interese públiku, manifesta iha serbisu ne’ebé dedika nafatin ba komunidade lokál sira, Governu deside atu fó, títulu definitivu, veíkulu motorizada ida ba Xefe suku ida-idak ne’ebé remata ona sira nia mandatu iha loron 28 Novembru 2023 ka ba Xefe suku sira ne’ebé ezerse ona mandatu husi tinan 2016 to’o tinan 2023, maibé kontinua reeleita nafatin,” hakerek komunikadu imprensa ne’ebe redasaun assesu hosi portal governu.

Razaun governu fo doasaun veikulu motorizada ne’e tanba mos idade no kondisaun motorizada ne’ebé utiliza husi Xefe suku sira ne’ebé husi ona sira-nia kargu iha loron 28 fulan-novembru tinan 2023, no hanoin ba kustu reparasaun (atu hadi’a filafali) nian relasiona ho valór patrimoniál ne’ebé tuun, Governu deside halo doasaun hanesan alternativa ida ne’ebé viavel liu,

“Despeza sira kona-ba  rejistu propriedade veíkulu motorizada no enkargu sira seluk nian sei responsavel husi Xefe Suku antigu sira ne’ebé sai benefisiáriu ba doasaun ne’e,” hakerek komunikadu ne’e.

Alende Rezulusaun Governu nian ba doasaun veikulu motorizada ba xefi suku sira ne’ebe konsellu ministru aprova, iha mos rezulusaun hat seluk hosi Ministeriu Administrasaun Estatal ne’ebe hetan mos aprovasaun hafoin aprezenta hosi Ministru Administrasaun Estatál, Tomás do Rosário Cabral, maka Projetu Dekretu-Lei kona-ba apoiu materiál no finanseiru ba vítima sira ne’ebé lakon hela-fatin tanba ahi han sira nia uma rasik ne’ebé sai hanesan sira nia hela-fatin permanente, Projetu Dekretu-Lei ba alterasaun dahuluk husi Dekretu-Lei n.33/2008, loron 27 fulan-agostu kona-ba Ijiene no Orden Públika, Projetu Dekretu-Lei, kona-ba Planeamentu Dezenvolvimentu Komunitáriu no ikus maka Projetu Dekretu-Lei ba alterasaun dalimak husi Dekretu-Lei n. 8/2013, loron 26 fulan-juñu, kona-ba Programa Nasionál Dezenvolvimentu Suku (PNDS).