PR Ramos-Horta Kondekora Medalla Méritu ba Alba Garzon

DILI, www.news-viptv.com – Prezidente Republika (PR), Jose Ramos-Horta kondekora Medalla Méritu prestijiozu ba Alba Cecilia Garzon, Reprezentante Nasionál husi Programa Alimentár Mundiál (WFP) iha Timor-Leste.

Medalla Méritu ne’e Xefi Estadu entrega liu husi serimónia ida ne’ebe realiza iha Eskritóriu Nasionál WFP nian iha Dili, Tersa (17/7/2024), rekoñese kontribuisaun exepsionál Garzon nian ba dezenvolvimentu Timor-Leste, liuliu iha área seguransa ai-han, nutrisaun, no protesaun sosiál.

Ho karreira distinta liu dékada tolu iha kontinente oioin, Garzon kaer ona pozisaun xave iha Afeganistaun, Paquistaun, Malawi, no nasaun oioin iha América Latina no África, ne’ebé nia jere resposta umanitária kompleksu no implementa inisiativa dezenvolvimentu sustentável.

Nu’udar Reprezentante Nasionál WFP iha Timor-Leste, Garzon tau ona organizasaun ne’e nu’udar parseiru importante iha inisiativa governamentais no dezenvolvimentu, lidera programa inovadór ne’ebé krusiál ba progresu nasaun nian. Ninia esforsu hametin signifikamente parseria entre Timor-Leste no Programa Alimentár Mundiál.

Iha komunikadu imprensa ne’ebe redasaun assesu, Prezidente Ramos-Horta hateten, “Senhora Garzon nia servisu exemplifika espíritu kooperasaun internasionál no dedikasaun atu hadi’a sidadaun sira-nia moris.”

Prezidente expresa gratidaun profunda ba Garzon ba ninia servisu no kompromisu ne’ebé metin atu hamenus inseguransa ai-han no hasa’e rezultadu nutrisaun iha nasaun laran.

Rekoñesimentu ida-ne’e hatudu parseria ne’ebé folin-boot entre Timor-Leste no Programa Alimentár Mundiál.