HANOI, www.news-viptv.com –Dialogu no rekonsiliasaun iha konstrusaun nasaun sai xavi importante Timor-Leste hamrik nu’udar nasaun, Prezidenti Republika Jose Ramos-Horta hateten ne’e wainhira fahe esperensia ba viagem notavel Timor-Leste nian hosi konflitu ba paz iha Akademia Diplomátika Vietnam nian, Sexta (2/8/2024).
Reportagem Jornalista VIP TV, Nuryanti Fatima hosi Hanoi, Vietnam
Iha vizita ba Akademia Diplomatika Vietnam ne’e, xefi estadu simu hosi husi Vise-Ministru Negósius Estranjeirus Vietname, Do Hung Viet ho Prezidente Akademia Diplomátika Vietnam, Embaixadora Pham Lan Dung no Diplomata sira iha akademia refere.
Prezidente Ramos-Horta hahú hodi konta hikas kona-ba Timor-Leste nia luta ba ukun-rasik-an no prosesu konstrusaun dame hafoin ukun-an. Nia destaka papél krítiku hosi rekonsiliasaun, partikularmente ho nasaun viziñu sira, hodi estabelese estabilidade ne’ebé ohin loron Timor-Leste goza.
Xefi Estadu mos fahe nia esperensia kona-ba ninia envolvimentu iha inisiativa pás globál, inklui esforsu sira iha Médiu Oriente. Nia subliña prinsípiu sentrál ida hosi nia aprosimasaun ba rezolusaun konflitu: “Laiha funu ida maka lori pás; diálogu de’it maka lori pás.”
Eventu ne’e hatudu sesaun pergunta no resposta ne’ebé ativu ho estudante sira akademia nian. Bainhira husu kona-ba Timor-Leste nia adesaun ba ASEAN, Ramos-Horta espresa katak Timor-Leste nia kontribuisaun prinsipál sei fahe ninia esperiénsia kona-ba harii pás no ultrapasa konflitu ne’ebé prolongadu. Nia halo paralelu entre Timor-Leste no Vietname nia dalan ba auto-governasaun, hodi sujere lisaun importante ne’ebé bele aprende hosi nasaun rua nia esperiénsia.
Iha nia mensajen ikus ba aspirante diplomata sira, Prezidente Ramos-Horta enkoraja aprendizajen kontínua, haraik-an, respeitu, no kompromisu ne’ebé forte ba direitus umanus.
Vizita ida-ne’e subliña relasaun diplomátika ne’ebé buras entre Timor-Leste no Vietnam, no mós Timor-Leste nia envolvimentu ne’ebé aumenta ho komunidade ASEAN ne’ebé boot.