PR Horta propoin CNRT bolu tan Parpol ida forma Governu

DILI, www.news-viptv.com – Hare´e ba rezultadu Eleisaun Parlamentar 2023 ne´ebe laiha partidu ida maka manan maioria, inklui Partidu CNRT, maski sai vensedor, Prezidenti Republika (PR) Jose Ramos Horta propoin atu CNRT bele bolu partidu politiku (parpol) ida hodi forma governu.

Xefi estadu propoin ne´e ba CNRT, partidu ne´ebe lideradu hosi Kay Rala Xanana Gusmão, maski apuramentu nasional ne´ebe halo hosi Commisão Nacional de Eleiçoes (CNE) hela deit sentru votasaun 4 hosi Irlanda Norte, CNRT kontinua hetan deit kadeira 31 hosi votantes hamutuk 286.794 (41.65%) ne´ebe vota ba partidu ho numeru 12 ne´e.

“Bom, primeiru laiha partidu ida ke pelumenus ita seidauk rona rezultadu komfirmadu hosi tribunal rekursu sei semana ida tan karik mais tuir observasaun hot-hotu, dadus hot-hotu laiha partidu ida manan absoluta.  Hau nia opiniaun uluk kedas partidu ne´ebe manan absoluta ka lae mesmu manan maioria absoluta, buka komvida partidu ida tan ka rua hodi forma governu para bele hetan maioria bo´ot liu para bele mos hametin liu tan estabilidade rai laran, governasaun,” dehan PR Horta, Kinta (25/5/2023), iha Palasiu Presidensial hafoin despedida atleta Para Games Timor-Leste nian ba Kambodia.

Xefi estadu hateten tan, tamba CNRT mos la manan absuluta, maibe nia fiar Xanana sei koalia no estuda ho nia partidu hodi partidu seluk se maka CNRT sei bolu ba forma koligasaun iha Governu.

“Solusaun uniku maka CNRT ho partidu ida ka rua tan ou ida deit mais ho sufisienti hau hare tamba situasaun dezafiu boot ba rai ne’e governu, lider tenki hatudu nia matenek, nia vizaun para oinsa halibur hot-hotu para halo governu forte, Parlamentu mos unidu para rai ne’e haksoit ba oin,” dehan PR Horta.

Ema numeru ida iha Timor-Leste ne´e esklarese, dezafiu bo´ot ne´ebe nasaun infrenta maka adezaun ba ASEAN no rekoperasaun ekonomia.

“Servisu todan lo´os para rekoperasaun ekonomika i labele hanoin deit para gasta deit laiha retornu tenki iha produtivu. Klaru buat balun investe laiha duni retornu emidiatu tanba laos ba faan sasan ka saida investimentu ba joventude, investimentu ba kosok oan sira, neé investimentu bo´ot teb-tebes retornu sei bo´ot ba futuru kuandu sira ho labarik ne’ebe ho saude diak, labarik ne’ebe estudu ho rezultadu diak, depois ba universidade,  sei sai rezultadu diak, signifika investimentu ba futuru mak ida ne’e,” dehan xefi estadu.

Nia mos fo hanoin katak governu forte tenki iha mos nia lideransa ne´ebe iha esperensia hosi nia membru governu sira, kualifikadu akademiku no lider iha nia area duni.

Iha governu atual, FRETILIN-PLP-KHUNTO antes eleisaun halo ona platforma governu ho espetativa karik kontinua manan ho kadeira maioria sei kontinua ukun iha governu foun. Hosi kadeira ne´ebe dadauk iha partidu tolu ne´e iha deit kadeira 28.

Dadauk ne´e CNE apura ona votos ho porsentazem 99.73% hosi sentru votasaun 1.468 no falta 4 hodi kompleta 1.472. Sentru Votasaun 4 ne´ebe sedauk sura maka hosi Irlanda Norte.

Iha ElPar 2023, hosi total eleitor 890.145 ne´ebe rejista, eleitor ne´ebe partisipa iha 701.733 ou 78.83% ho eleitor Feto: 341.879 (48.72%), Mane: 359.854 (51.28%). La tuir vota 188.412 (21.17%)

Maski provizoriu hela, Partidu Politiku 5 maka fixu ona liu bareira ba Parlamentu Nasional maka alende CNRT ho nia kadeira 31, tuir kedan FRETILIN ho kadeira 19 hosi votos 176.930 (25.69%), Partido Democratico kadeira 6 ho votos 64.194 (9.32%), KHUNTO ho kadeira 5 ho votos 51.768 (7.52%), no PLP ho votos 40.652 (5.90%) hetan kadeira 4.