PR Horta fo Diploma Rekonesementu ba Mediku Kubanu nain 71

DILI, www.news-viptv.com – Valoriza servisu mediku Kubanu sira iha Timor-Leste, Prezidenti Republika (PR) Jose Ramos Horta fo diploma rekonesementu ba mediku Cubano hamutuk nain 71.

Alende diploma rekonesementu ne´e, Xefi Estadu mos atribui medalla meritu ba doutor Juan Calos Chavez no doutora Rosa Dellia Duconger Castellanos ba sira nia misaun durante tinan rua iha Timor-Leste.

“Médikus 71 termina sira-nia mandatu sira-nia missaun iha Timor-Leste, sira fila, ha’u halo desizaun par rekoñese sira-nia servisu iha Timor-Leste, ita-nia relasaun ho Kuba metin loos importante liu mak setór saúde, hahú kedas iha 2005, kuandu sira haruka médiku mai. Sira fila ba sira-nia rain, ha’u hanoin mínimu Prezidénsia bele halo, rai ida-ne’e bele halo estadu halo rekoñese sira atraves diploma ida hanesan lembransa ba sira,” dehan PR Horta ba jornalista sira, Kinta $/5/2023) iha Palasiu Prezidensial, Dili.

Xefi estadu esplika, hafoin restaura independénsia iha 2002, Timor-Leste iha de’it médiku na’in 20, no dadauk ne´e iha ona 1.000.

“Kuba oferese hahú kedas ho 100 resin sa’e 200 ital, depois loke eskola medisina, antes atu loke eskola medisina, hahú 2002 governu haruka 700 jovens ba Kuba. 700 jovens ne’e, 100 pursentu ho bolsa de estudu Kuba nian, Timor la selu buat ida, buat hotu-htou Kuba mak kobre,” xefi estadu esplika.

Maski dadauk ne´e Timor-Leste iha ona médiku 1000 resin, ida ne´e seidauk sufisiente, no sei falta espesialísta iha área hanesan dentísta (nehan), oftamolojia (matan), kardiolojia (fuan), pediátria (ba labarik).

“Presiza nafatin apoiu husi Kuba nian,” afirma PR Horta.

Xefe Estadu fo rekoñesimentu ba na’in 71 ne’e ho dekretu Prezidente Repúblika No 30/2023, loron 2 fulan, no medalla ne’e kria liu husi dekretu-lei No 15/2009, 18 Marsu atu rekoñese no agradese ba sivíl no militár, nasional no internasional ne’ebé fó ona sira-nia kontribuisaun signifikativu ba estabilidade nasional.

Partisipa iha serimónia ne’e, Ministru Finansas, Rui Augusto Gomes, Embaixadora Kuba iha Timor-Leste, Grisel Alina Aaldam Aldama Inniss no seluk tan.