Pozitivu COVID-19, PM Taur Adi’a Vizita ba Australia

𝐃ILI, www.news-viptv.com – Primeiru Ministru (PM) Taur Matan Ruak adi’a nia vizita ofisial ba Australia hafoin pozitivu SARS-COV-2 ou COVID-19.

Laos PM Taur deit, nia espoza, Isabel da Costa Ferreira ne’ebe sei akompana mos xefi governu nia vizita ofisial ne’e mos pozitivu COVID-19.

Tuir ajenda, PM Taur ho nia espoza iha Kuarta (9/2/2022). Maibe, hafoin halo teste SWAB iha loron 07 no loron 08 fulan-febereiru tinan 2022 ne’ebé fó sai iha tersa loraik ne’e, konfirma Xefe Governu ho nia espoza Dra. Isabel da Costa Ferreira, pozitivu SARS-COV-2.

“Maske pozitivu COVID-19, maibé Xefe Ezekutivu ho espoza iha kondisaun saúde di’ak hela, no tuir rekomendasaun médiku, Xefe Governu presija deskansa iha uma tuir protokolu saúde nian hodi hein teste tuir mai,” hakerek komunikadu imprensa ne’ebe publika hosi Gabinete Primeiru Ministru, Tersa (8/2/2022).

Kona-ba pedidu adia vizita ne’e, Xefe Governu komunika ona ho Ministra Negósius Estranjeirus no Kooperasaun, Adaljiza Albertina Xavier Reis Magno atu komunika formalmente ba iha parte Governu Austrália nian. Vizita oficial sei ajenda fali ba tempu oportunu.

PM Taur no espoza Isabel da Costa Ferreira hamutuk ho família no eskoltu sira, iha sesta-(28/1/2022) simu ona vasina doze datoluk (booster) nu’udar meius ida atu proteje an hosi propagasaun COVID-19 liuliu variante Omicron ne’ebé daudaun ne’e da’et maka’as iha País vizinu sira.

Desde semana rua nia laran, numeru pozitivu COVID-19 sa’e makas no tuir publikasaun Ministeriu Saude, Segunda (7/2/2022), iha tan kazu pozitivu foun hamutuk nain 98 no total kazu ativu dadauk ne’e iha 611.

Total komulativu kazu konfirmadu Timor-Leste nian iha ona 20.501 no 122 maka relata mate tamba COVID-19.