Possibilidade Ângela Sarmento ou Leocadia de Jesus sei Troka Deputada Veneranda Lemos

Dili, www.news-viptv.com – Relasiona ho deputada Veneranda Lemos Martins ne’ebe hetan ona konfiansa hodi asumi kargu Prezidenti Autoridade Munisipiu Baucau, Ângela Corvelo Sarmento no Leocadia de Jesus maka sei troka Veneranda Lemos.

Hare ba lista deputada CNRT nian lista feto ne’ebe tuir kedan maka Ângela Sarmento ne’ebe iha terseira lejislatura (2012-2017) asumi vise-sekretaria meza no dadauk ne’e asumi kargu nu’udar assessor principal ba Ministra Edukasaun, Dulce Soares. Tuir kedan lista Ângela maka Leocadia de Jesus, Secretaria CNRT iha estrutura Munisipiu Dili.

Ba jornalista sira, Vise Prezidente Bankada CNRT, Patrocino Fernandes informa katak atu substitui Deputada Veneranda, tuir lista tenke troka Feto.

Patrocino esplika, prosedimentu ida konaba substituisaun deputadus ne’e, nia prosedimentu sira ne’e hatur tia ona lei eleitoral ba elisaun parlamentar ninian. Tanba ne’e kuandu deputada ida asumi fali funsaun seluk, ninia prosesu substituisaun ne’e tuir sekuensi lista ne’e mak mai. Prosedimentu ida katak, tanba atu kompleta ba ezjizensia 30%  kuota ba feto nian ne’ebe regula ona iha lei elisaun nian.

“Entaun prosedimentu seluk ida mak, bainhira feto ida mak sai, entaun ida ne’ebe atu substitui ne’e tenke feto ida, para atu bele kumpri nafatin ba kuota 30 % feto iha Parlamentu Nasional tuir lei, depois iha buat seluk ida mos mak, iha partidu politiku iha nafatin nia kompitensia para atu bele disi se mak atu substitui,” hatete Patrocino ba jornalista sira iha Parlamentu Nasional, kuarta (17/1/2024).

Dadauk ne’e, iha Parlamentu Nasional, CNRT iha nia deputada nain 10, inklui Prezidenti PN, Fernanda Lay.