Portugal Belun “Rohan Laek” Timor-Leste

DILI, www.news-viptv.com – Prezensa Prezidenti Portugal, Marcelo Rebelo de Sousa iha seremonia investidura Prezidenti Republika foun Timor-Leste, Dr. Jose Ramos Horta hanesan belun “rohan laek” ba Timor-Leste.

PR Horta esplika, Portugál, rai ne’ebé kesi Timor-Leste ho lasu sekulár sira no mós afetu ne’ebé klean, ohin (sexta, red) hamutuk ho Timor-Leste ho prezensa deretamente Prezidenti Portugal, Prof. Dr. Marcelo Rebelo de Sousa.

“Obrigadu tanba mai tiha ona hosi dook tebes. Portugal sai tiha ona belun loloos ida, ne’ebé solidáriu, jenerozu no persistente, iha ita-nia rain durante momentu susar sira hotu. Amizade no gratidaun rohan-laek, Amigu Prezidente Marcelo,” dehan PR Horta, Sexta (20/05/2022), iha Tasi Tolu, Dili.

Xefi estadu mos manifesta nia sentidu rekoñesimentu ba solidariedade inestimável hosi rai sira CPLP nian ne’ebé ohin reprezenta hosi Portugál, Guiné-Bissau ho prezensa PM Nuno Nabian nian, no hosi Brazil, liuhosi Enviadu Espesiál Prezidente Bolsonaro nian, Embaixadór Adelmo Garcia. Inklui, prezensa estimadu Sekretáriu-Jerál CPLP nian, Dr. Zacarias Albano da Costa.

“Maske ita-nia frajilidade no limitasaun sira ne’ebé rekoñesida, Timor-Leste buka tiha ona daudaun atu partisipa ativamente iha instituisaun rejionál no internasionál sira ne’ebé Timor-Leste halo parte. Ita sei kontinua atu esplora ativamente forma inovadora sira atu reforsa ita-nia partisipasaun iha CPLP no iha g7+, ida ikus ne’e nu’udar inisiativa ida hosi Timor- Leste, ne’ebé oras ne’e  rekoñesida internasionalmente,” dehan xefi estadu .

“Ha’u sauda Señor Ministru Planeamentu no Ekonomia Serra Leoa nian, Prezidente en ezersísiu ba g7+, no estimadu Dr. Francis KAI-KAI, nune’e mós Sekretáriu- Jerál, Dr. Hélder da Costa.”

Iha períodu konturbadu ida-ne’e iha Europa tanba konsekuensia trajédia funu nian iha Ukránia, PR Horta solidariza ho belun sira hotu hosi uma Boot Europa, Europa ida ho istória naruk ba solidariedade no parseria ho rai sira hosi Áfrika, Karaíba no Pasífiku.

“Ha’u saúda Prezidente Emmanuel Mácron hosi Fransa tanba nia aten-barani no determinasaun iha diálogu ho Prezidente Putin atu hakotu funu iha Ukránia no evita buat aat liuhotu ne’ebé se bele mosu mai,” dehan PR Horta.