PN Halakon ona Lei Pensaun Mensal Vitalisia

DILI, www.news-viptv.com – Ejijensia Estudante Universitaria Timor-Leste (EUTL) ne’ebe lori aspirasaun povu hodi halakon Lei Pensaun Mensal Vitalisia, hetan ona aprovasaun legal husi Parlementu Nasional, ne’ebe aprova ho unanimidade iha jeneralidade ba Projetu Lei Nu.11/VI (3.o) – Revoga Pensaun Mensal Vitalisia ba Deputadu no Eis-Titular sira Orgaun Soberania nian.

“Distintu deputados, rezultadu da votasaun ba PJL Lei numeru 11/VI (3º), a favor 61, kontra 0, abstensaun 0, ne’ebe PJL nomeru 11 passa iha jeneralidade,” deklara Maria Fernanda Lay, Prezidenti Parlamentu Nasional, Kinta (25/9/2025).

Reprezenta Bankada KHUNTO, Deputada Olinda Guterres iha nia intervensaun hateten, nia konkorda atu halakon totál Lei Pensaun Mensal Vitalisia, tanba povu barak mak sei terus.

“Pensaun mensal vitalisia ne’e tenki halakon duni, labele eziste tan,” deklara Deputada KHUNTO ne’e.

Entertantu Deputadu CNRT Gabriel Soares, apoiu mós intervensaun husi partidu KHUNTO Olinda Guterres, kona-bá Projetu Dekretu Lei Nu 11/VI/(3a) Revoga Lei Pensaun Mensal Vitalisia ne’e hamos total ho regalias hotu husi primeira legislatura tinan 2002 no ba futuru hamos labele ejiste tan.

“Hau husi Bankada CNRT, Hau apoiu totál proposta Projetu Dekretu Lei Nu 11/VI/(3a) ne’ebe mai ho nia hanoin katak apaga totál pensaun vitalisia, labele eziste tan Iha Timor-Leste, ha’u lakoi balun ibun dehan hasai maibe liman sorin hakuak hela, ne’e ami laiha konsensu bele konsensu ho povu tanba povu mak Di’ak liu iha rai doben ida ne’e,” nia hateten.

Deputada FRETILIN, Nurima Alkatiri hateten, Pensaun Vitalisia tenki hapara total duni, “Laiha tan pensaun vitalisia ho privelijiu sira”.

Iha loron hanesan, maski FRETILIN no PLP konkorda atu halakon pensaun vitalisia total, maibe partidu opozisaun rua ne’e mos apresenta Projetu Lei Nu. 10/VI (3.o) – Rejime Juridiku Seguransa Sosial ba Titular sira Orgaun Soberanu no Eis-Titularsira, ne’ebe iha votasaun la passa, ho 22 votu a favor, 38 kontra no 1 abstensaun.