PM Xanana-VPM Kalbuadi ho Embaixadora Wenli Deskuti Relasaun Timor-Leste ho Xina

DILI, www.news-viptv.com  – Primeiro Ministru Xanana Gusmão hamutuk ho Vise Primeiro Ministro, no Ministru Koordenadór Asuntu Ekonomia no Ministro Turismo no Ambiente Francisco Kalbuadi Lay halo enkontru ho Embaixadora Republika Popular Xina, Wang Wenli, Segunda (15/7/2024), iha Salaun Ministeriu Turismu no Ambiente, Farol, Dili.

Objetivu inkontru ne’e hodi koalia kooperasaun ne’ebe Timor-Leste sei halo ho Xina relasiona ho vizita estadu hosi Prezidenti Republika Jose Ramos-Horta ne’ebe sei halao iha 27 Jullu 2024.

Relasaun bilaterais entre Timor-Leste ho Xina hahu kedan iha tinan 2000 wainhira Timor-Leste iha hela governasaun ONU nia lideransa liu hosi estabelesementu nia edifisiu no offisialmente hahu wainhira Timor-Leste hetan nia restaurasaun independensia iha 20 Maiu 2002.

Iha relasaun bilateral, Xina apoiu konstrui edifisiu Palasiu Prezidensial ne’ebe dadauk ne’e sai palasiu ba knar xefi estadu. Alende ne’e Xina mos apoiu tan kontrusaun edifisiu Ministeriu Negosiu Estranjeiru no Koperasaun, inklui ikus edifisiu ba Ministeriu Defeza no Kuartel Jeral F-FDTL.