PM Xanana Simu Vizita Veteranu no eis Forsa NZ iha Misaun INTERFET no UNAMET

DILI, www.news-viptv.com – Primeiru Ministru Xanana Gusmao simu veteranu na’in-15 hosi Nova Zelándia ne’ebe vizita Timor-Leste hodi halo hela gravasaun filme dokumentáriu kon¬a-bá sira nia partisipasaun iha misaun The United Nations Mission in East Timor (UNAMET) no mós The International Force East Timor (INTERFET).

PM Xanana konsidera prezensa militár Nova Zelándia iha tempu ne’ebá nu’udár ezemplu di’ak tebtebes bá mundu, hodi dehan katak ho sira-nia partisipasaun, sira-nia intervensaun Timor Leste konsege hetan situasaun hakmatek no kalma hodi bele hahú prosesu harii Estadu.

Xanana Gusmão dehan, iha fatin barak iha mundu Peace Keeping Force (PKF) halo intervensaun besik tinan 30 ona maibé nafatin de’it no laiha pás, tanba ne’e sira nia prezensa iha Timor-Leste ne’e konsege rezolve problema hodi prepara sai rai ida ukun-an, ne’e hanesan ezemplu bo’ot ida bá mundu tomak.

Delegasaun ne’e lideradu hosi Prezidente Asosiasaun veteranus Nova Zelándia, Wayne Buck no Majór Jenerál, Martyn Dunne, ne’ebe hateten prezensa sira nia ne’e hodi dokumenta servisu forsa nova zelandia nian iha Timor-Leste wainhira involve iha misaun INTERFET, no UNAMET.

Iha fatin hanesan, adjuntu komandante INTERFET 1999, Majór Jenerál Martyn Dunne espresa sentimentu kontente tanba bele vizita hikas Timor-Leste hafoin tinan lubuk ida.

Durante estadia iha Timor-Leste konsege vizita militár Nova Zelándia nia fatin mate iha Tilomar-Covalima bainhira hala’o misaun INTERFET no konsege haree mudansa barak iha nasaun ne’e.

Durante enkontru, ko’alia mós kona-bá selebrasaun loron INTERFET nian iha fulan setembru 2024 no sei partisipa hosi veteranus Nova Zelándia.