PM Xanana Lansa Konstrusaun EDTL, E.P Sub Estasaun Comoro no Redi Transmisaun 150 KV

DILI, www.news-viptv.com – Primeiru Ministru (PM), Kay Rala Xanana Gusmão halo lansamentu bá konstrusaun Eletrisidade Timor-Leste Empreza Públika (EDTL, E.P) sub-estasaun Comoro no Redi Transmissaun 150 kilovolt (kv), iha Fomentu II, Suku Comoro, Postu Administrativu Dom Aleixo, Munisípiu Díli, Kinta (09/01/2025).

EDTL, E.P konstrui tán Sub-estasaun Comoro no Rede Transmisaun ho kapasidade enerjia 150 kv hodi bele haforsa distribuisaun enerjia elétrika bá populasaun iha territóriu nasionál.

Primeiru-Ministru konsidera konstrusaun foun bá sub-estasaun ne’e bele haforsa liu-tán sistema tekonolojia, atividade komersiál, industriál bá kada uma no instituisaun Estadu sira, eskola, liu-liu oferese enerjia elétrika ne’ebé ho kualidade bá ospitál sira.

“Presiza garante enerjia eletrika ne’ebe oferese, bainhira iha problmea tenki responde kedan. Ida ne’e maka ohin ita halo iha ne’e. Se iha nesesidade atu halo ida iha Aileu, nune’e ida Hera ne’e ladun forsa karik bele simu hosi Betano nian,” dehan PM Xanana iha komunikadu ne’ebe redasaun assesu.

Iha fatin hanesan, Ministru Obras Públikas (MOP), Samuel Marçal esplika, projetu ida-ne’e ho karákter urjente tanba durante tinan barak sempre rona populasaun halerik kona-bá ahi-mate akontese iha fatin hotu-hotu.

Tanba ne’e maka tenke harii duni sub-estasaun ida iha Comoro hodi reforsa sub-estasaun Camea-Becora, ne’ebé fornese enerjia elétrika bá Dili, fornese bá Ermera, no bá to’o Aileu.

Governante ne’e observa iha Dili laran, otél barak mak sei presiza enerjia eletrika no iha tempu oin mai, sei iha investór barak tama mai atu halo investimentu, entaun, enerjia elétrika sai asuntu importante.

Tanba ne’e maka konstrusaun ida-ne’e sei lori tinan ida resin bele konklui atu bele garante la’ós 100%, maibé, bele minimíza kestaun ahi mate iha Dili no mós fatin sira seluk.

Governu nia devér atu hadi’a kualidade enerjia elétrika molok ezije populasaun atu selu, nune’e Samuel Marçal husu bá funsionáriu hotu-hotu atu fiar-malu, unidade, servisu hamutuk hodi bele alkansa rezultadu ne’ebé lori duni benefísiu bá povu.

Objetivu esensiál hosi konstrusaun sub-estasaun ne’e hodi ajuda halo balansu distribuisaun enerjia elétrika iha Sidade Díli liu-liu iha parte oeste, sub-estasaun ne’e mós sai hanesan alternativa hodi asegura fornesimentu enerjia bainhira halo manutensaun ka akontese avaria iha sub-estasaun Camea.

Projetu konstrusaun no instalasaun sub-estasaun kompostu hosi transformadór unidade tolu ho kapasidade 120 MVA, ho nia asesória sira inklui Sistema SCADA. Alende ne’e rede transmisaun 150 kv ho distánsia kilómetru lima, double circuit.

Implementasaun projetu ne’e baze bá estudu viabilidade ne’ebé halo ona durante tinan ida resin hosi kompaña Consultant PT. Amythas JV ho PT. Hexa Integra Electrica no Caiulu Unip, Lda.

Kontratu projetu ne’e ho durasaun fulan 15 ho montante orsamentu miliaun US$ 22-resin no implementa hosi kompaña internasionál TBEA.

Embaixador Xina iha Timor-Leste, Wang Wenli hateten projetu ne’e nu’udar inisiu diak iha tinan 2025 ba kooperasaun entre Xina no Timor-Leste no espera projetu ne’e sei lao diak no kualidade.

“Kontente tebes atu simu good start kooperasaun entre Xina no Timor-Leste iha inísiu 2025. Empreza Xina sira-ne’e iha ona esperensia iha indústria eletrisidade Timor-Leste nian durante tinan barak ona, ne’ebé asegura operasaun ne’ebé seguru no estavel ba sistema eletrisidade nian no fó naroman ba uma rihun ba rihun iha Timor-Leste. Ha’u hakarak projetu foun ne’e la’o ho di’ak ho kualidade no benefísiu ne’ebé garante ba povu Timor-Leste tomak,” dehan Ambassador Wang.