PM Anwar Ibrahim Vizita Timor-Leste

DILI, www.news-viptv.com – Primeiru-Ministru Malázia, Dato’ Seri Anwar Ibrahim halo vizita official mai Timor-Leste, Tersa (23/9/2025).

Iha vizita loron rua ne’e, PM Anwar Ibrahim iha loron dahuluk halo kedan inkontru ho Prezidenti Republika, Jose Ramos-Horta no Primeiru-Ministru Xanana Gusmão.

Vizita ofisial ida-ne’e ho objetivu atu troka hanoin kona-ba preparasaun adezaun formal Timor-Leste nian ba ASEAN ne’ebé sei realiza iha 26 Outubru, iha Kuala Lumpur, nune’e mós atu hametin relasaun bilaterál no kooperasaun ekonómika, sosiál no kulturál entre nasaun rua ne’e.

Iha nia inkontru ho PR Ramos-Horta, xefi estadu reaffirma amizade kmanek entre Timor-Leste no Malázia no sira-nia kompromisu ba Ázia Sudeste ida ne’ebé pás no prósperu. Enkuantu Timor-Leste prepara an atu sai membru ASEAN ba da-11 iha Cimeira ASEAN ba da-47 iha fulan-outubru tinan 2025, parte rua sei kontinua koordenasaun besik ho ASEAN hodi atinje roteiru sira seluk ne’ebé falta iha roadmap.

“Ha’u haksolok tebes mak ha’u hato’o benvindu ba ha’u-nia belun diak, Primeiru-Ministru Dato’ Seri Anwar Ibrahim, mai Timor-Leste. Ninia vizita hanesan reafirmasaun forte ida ba amizade profunda no duradoura entre ita-nia nasaun rua—ligasaun ida ne’ebé harii iha solidariedade no mantén ho valor sira ne’ebé ita fahe,” hateten Prezidente José Ramos-Horta.

Xefi estadu hateten tan, “Ita-nia relasaun ne’e ankra iha kompromisu komun ba demokrasia, justisa, no respetu mútuu. Apóiu firmi Malázia nian ne’e instrumentál durante momentu krítiku sira iha ita-nia istória: iha períodu antes restorasaun ita-nia independénsia, durante krize polítika 2006, no nia advokasia la para ba Timor-Leste nia membru ASEAN.”

Adezaun ASEAN: Timor Leste sei kontinua kordenasaun besik ho Malázia no ASEAN atu kompleta roteiru sira seluk ne’ebé falta iha roadmap atu sai membru tomak antes adezaun ne’ebé planeia ona iha Simeira ASEAN iha fulan Outubru tinan 2025.

Área Xave sira Kooperasaun nian ne’ebé Diskute mak, Komérsiu no Investimentu: Parte rua ne’e simu ho laran-haksolok interese Malázia nian iha ekonomia Timor Leste nian no konkorda atu fasilita investimentu ne’ebé fó benefísiu ba malu, liuliu iha agronegósiu, turizmu, servisu dijitál, no enerjia renovável.

Edukasaun no Abilidade: Lider sira kompromete atu habelar oportunidade ba estudante no ofisiál timoroan sira atu hetan benefísiu husi formasaun tékniku no profisionál, bolsa estudu, no interkámbiu ho instituisaun Malazia sira.

Konetividade no Fasilidade Halo Negosiu: Nasaun rua ne’e sei servisu atu hadia liu tan konetividade aéreu no marítima, fasilitasaun komérsiu, no parseria hodi hametin ligasaun entra povu no komérsiu.

Timor-Leste no Malázia sai parseiru kleur ona, Timor-Leste hateke ba oin atu kontinua harii futuru ida ho oportunidade sira ne’ebé partila hamutuk iha família ASEAN nian laran.

Iha tinan 2003, Primeiru-Ministru Mohamad Mahathir hala’o vizita ofisiál ida mai Timor-Leste antes remata ninia mandata, bainhira Malazia partisipa iha operasaun pás nian liu husi Nasoins Unidas nian, iha ne’ebé polísia liu 200 Malázia nian servisu iha kapasidade oioin iha UNPOL no FPU. Durante vizita ofisiál ne’e, mós asina “Akordo Ekonómiku, Tékniku, Siéntifiku no Kultural”, ne’ebé reflete importánsia no kompromisu forte ne’ebé nasaun rua ne’e iha atu hametin sira nia relasaun bilateral.

Aleinde ne’e, Malázia fó doasaun ba F-FDTL kamiaun militár 32, armas no munisaun. Hanesan sinál amizade nian, Timor-Leste fó ba Malázia rai bloku ida ba futuru konstrusaun Embaixada Malázia nian iha Dili.

Tuir ajenda, Iha loron ikus vizita nian, Primeiru-Ministru Anwar Ibrahim sei hato’o diskursu prinsipál Palestra Prezidensiál 2025 Série IV, iha loron 24 fulan-Setembru tinan 2025, ho títulu “ASEAN no Papél Timor-Leste nian.”

Prezidente Ramos Horta sei kondekora Primeiru-Ministru Dato’ Seri Anwar Ibrahim ho Grande Colar da Ordem de Timor-Leste, nu’udar rekoñesimentu ba ninia amizade kleur ona ho Timor Leste no mós apoiu ba ita-nia dezenvolvimentu nasionál no integrasaun rejionál nian.