Pastor Angkie : Keta Haluha Maromak Nia Diak

DILI, www.news-viptv.com – Maromak Atan hosi Igreja Bethel Timor-Leste (IBTL) Bethany, Pastor Johanes Angkie husu ba sarani sira atu labele haluha Maromak Nia Diak ne’ebe durante ne’e Nai halo ona iha tinan 2023.

“Ita bele haluha buat ne’ebe la diak ba ita, buat negativu sira ne’ebe akontese ba ita nia moris durante tinan 2023, maibe keta haluha saida maka Maromak halo diak ona ba ita,” hateten Pastor Joyanes Angkie iha nia pregasaun loron ikus ba tinan 2023 iha Kultu Domingu (31/12/2023), iha IBTL Bethany, Bidau Akardiruhun, Dili.

Oinsa maka sarani sira labele haluha Maromak Nia diak ne’ebe simu ona, Maromak Atan ne’e esplika, nu’udar sarani tenki kontinua hasa’e agradesementu ba Nai Maromak liu hosi orasaun no lee Maromak Nia Lia Fuan Diak.

Maromak Nia Lia Fuan Diak iha Salmu 107: 1 hateten “Agradese ba Nai, tanba Nia diak! Tanba Ninia domin metin dura to’o tinan ba tinan”.

“Maromak Nia oan sira tenki tenki hasa’e agradesementu nafatin ba Nai. Tenki supporta malu, fo hanoin ba malu, tenki adora nafatin ba Nai, Hahii nafatin ba Nai, fo Gloria ba Nai, atu Maromak Nia diak ita simu nafatin iha tinan 2024,” dehan Pastor Angkie.

Moris tuir Nai Jesus Nia dalan, Pastor Angkie esklarese, sarani sira mos tenki hatene fo perdua ba malu, maski nu’udar ema umanu susar atu haluha saida maka ema halo ba nia moris.

“Nai Jesus fo perdaun ba ema sira ne’ebe halo aa tba Nia. Maski iha hedi nia ba Cruz, ema baku, tebe, koalia aa tba Nia, maibe iha Kruz nia leten Nia husu nafatin ba Aman Lalehan atu fo perdaun ba sira hotu tamba sira la hatene saida maka sira halo ba Nia. Iha ne’e atu hateten, Domin Nai Jesus nian ne’ebe moris iha Ita, ita mos tenki fo perdaun ba ema ka inimigu sira, atu perdaun ne’ebe ita husik bele mos monu ba Aman Nia Fuan,” dehan Pastor Angkie.

Tamba ne’e, iha 2024, Pastor Angkie husu ba sarani sira atu kontinua hakbesik ba Nai Maromak ne’ebe fo ona diak ba moris, haklaken hotu Maromak Nia Lia Fuan Santo liu hosi dalan oioin, inklui plataforma media social ne’ebe globalmente ema hotu uza ona.

“Ita labele uza fali media social sira, Facebook hodi koalia fali lian negativu ou aat nian. Labele koalia ka hakerek ema nia vida, ema nia hahalok aat. Ita tenki koalia los, lia fuan ne’ebe bele ajuda mos ema bele iha mudansa, hakerek Maromak Nia Lia Fuan Santo ba, tamba Maromak Nia Lia Fuan maka bele muda ema nia hanoin, hahalok no moris, Maromak Nia Lia Fuan iha poder, Lia Fuan Maromak Nian bele muda ema nia vida,” dehan Maromak Atan ne’e.

Iha livru Testamentu Tuan Lamentasaun 3:22-23 “Tanba Nai nia domin metin, nunee ami la lakon hotu, Ninia laran luak nunka para; buat sira nee sai foun dadeer-dadeer; O nia fidelidade mak boot.”

“Liu hosi Lamentasaun 3:22-23 atu hateten katak, Maromak fo ona Nia Domin, Maromak nunka para, Maromak Nia planu sei kontinua iha tinan 2024, tinan 2024 nu’udar tinan bensaun hosi Nai Maromak, Maromak Nia movimentu no revivamentu sei akontese bebeik, Maromak Nia Vitoria fo nafatin iha loron-loron ne’ebe foun, ema barak sei konese lolos se maka Nai Jesus, nasaun ne’e mos Jesus sei hamanan hodi salva klamar barak hodi lao tuir dalan lo’os nian, katak so Jesus maka Nia Salvador, so Jesus mak Ita tenki Adora laiha tan Maromak seluk,” deklara Pastor Angkie.