Os Verde de Timor Bele Konkore iha ElPar 2023

DILI, www.news-viptv.com – Partidu Os Verdes de Timor (PVT) ne´ebe lidera hosi Antonio Lela Hunu Cruz partidu politiku foun iha Timor-Leste ne´ebe bele ona konkore iha Eleisaun Parlamentar (ElPar) tinan 2023.

Prezidenti Tribunal Rekursu, Deolindo dos Santos esplika, PVT legalmente rejistradu ona iha Tribunal Rekursu hafoin sira nia dokumentus depois prosesu avaliasaun, priense ona kriteria nudar partidu politiku.

“Os Verdes sai ona partidu politiku tuir lei,” dehan Deolindo dos Santos ba jornalista sira iha Parlamentu Nasional, Kinta (6/10/2022).

Antes ne’e, nia informa, iha partidu politiku 4 mak bá iha Tribunál Rekursu hodi submete sira nia dokumentu organizasaun nian hodi bele sai partidu politiku ida, Maibé, depois prosesu avaliasaun, Tribunal Rekursu deside indeferidu hotu, tanba seidauk kompleta rekezitu.

Hosi partidu politiku 4 refere, ikus PVT ho Partidu Timor Forte (PATIFOR) mak hatama fali no PVT maka admitidu, no PATIFOR oras-ne’e Tribunál seidauk pronunsia definitiva. Tribunál mós remete fila-fali ona PATIFOR ninia dokumentu bá Ministériu Justisa atu haree tarrefa sira, bainhira kompleta ona maka Tribunál foin deside.

ASDT, PPT ho KOTA Labele Kompete

Entertantu, partidu tuan hanesan Partidu Asosiasaun Sosiál Demokrata Timorense (ASDT), Partidu Povu Timor (PPT) ho Klíbur Oan Timor Asuwain (KOTA), labele ona kompete iha ElPar 2023 tanba partidu hirak ne’e lakon ona estatutu nu’udár partidu polítiku.

“Tuir lei, sira-nia estatutu nu’udár partidu ne’e laiha tiha ona. Ne’ebé, sira labele tuir eleisaun. Mais de 4 ka 5. Ha’u lembra maka ASDT, PPT no KOTA ho tán partidu rua ka tolu tán, ne’ebé ha’u la lembra,” informa Deolindo.

Dadauk ne´e, deolindo hateten, Partidu Politiku ne´ebe hamutuk 20.

Hosi 20, iha deit partidu 8 maka iha asentu Parlamentu Nasional maka Congresso Nasional da Recontrução do Timor (CNRT), Frente Revolucionario Timor-Leste Independente (FRETILIN), Partido Libertasaun Popular (PLP), Partido Democrático (PD), Klibur Haburas Unidade Nasional Timoroan (P-KHUNTO), Partidu União Democrática Timorense (UDT), Partidu Frente-Mudança (FM), Partidu Unidade Desenvolvimento Democratico (PUDD).