ONU Sei Koalia ho Parseiru Dezemvolvimentu Apoia Programa Merenda Eskolar

DILI, www.news-viptv.com – Organizasoens Nasoens Unidas (ONU) iha nia programa servisu Timor-Leste nian sei koalia ho sira nia parseiru dezemvolvimentu hodi apoia programa merenda eskola ne’ebe implementa hosi Ministeriu Edukasaun.

Koordenador Residensia ONU iha Timor-Leste, Funmi Balogun iha nia inkontru ho Ministra Edukasaun, Dulce Soares hateten, ONU komitmentu atu kontinua apoia programa edukasaun nian, inklui oinsa merenda eskolar bele mos to’o iha estudante sira iha area rural.

“Ami rona ona husi Ministra Edukasaun konaba Governo nia programa saida mak ami bele halo, nune’e mos iha planu ida husi Governo katak Ami sei enkontru tan iha fulan outobru ho parseiru dezemvolvimentu sira hotu no mos ami sei hare liu ba merenda eskolar nune’e laos implementa deit iha kapital maibe ami nafatin esforsu oinsa bele kobre hotu ba area rural sira,” hateten Funmi Balogun ba jornalista sira, Tersa (5/9/2023), iha edifisiu Ministeriu Edukasaun, Villa Verde, Dili.

Iha fatin hanesan, Ministra Dulce Soares hateten, durante ne’e Ministeriu Edukasaun iha nia implementasaun programa edukasaun hetan mos tulun hosi ajensia ONU hanesan UNICEF (ajensia ONU ne’ebe hare asuntu labarik ho inan) no WFP (ajensia ONU ne’ebe hare ba programa ai-han).

“Simplemente kordenadora (Funmi, red) espresa deit sira nia apoiu kontinua ba iha Governo Timor Leste no mos ba Ministerio Edukasaun no  ajensia UN sira sai ita nia parseiru ho tempo naruk ona ne’ebe suporta iha kurikulum, formasaun dos professores, fasilidades ba Covid-19 no mos merenda escolar,” informa Ministra Dulce.